Mûmâ ileyh mâh-ı merkūmun yirmi beşinci gicesi terk-i mansıb-ı hayât ve mahsûl-i ʿömr-i girân-mâyesin müsellem-i dest-i hâdimü'l-lezzât eyleyüp, Nakībül-eşrâf olan es-Seyyid Abdullah Efendi Sadâret'le mübeccel ve Nekābet hidmet-i pür-meymeneti ile Mîrzâ-zâde es-Seyyid Mehmed Saʿîd Efendi mest-i rahîk-i matlab ü emel oldu. Müteveffây-ı mûmâ ileyh tasarruf-ı dahl ü harcında kāsır ve idâre-i umûrunda hâyim ü mütehayyir olduğundan, [M1 300] düyûn-ı kesîreye mübtelâ ve eyyâm-ı zindegânîsi muzâyaka vü zarûretle hebâ olduğundan gayri, bahtı dahi yâver olmadığı yalnız elli bir gün kadar Kadıʿaskerlik etdiğinden maʿlûm-ı erbâb-ı hüccet ü nazardır. Kābil-i tahsîn olur eşʿârı ve selâsetden gayr-ı hâlî güftârı var idi. Üç gün sonra Sadâret-i Anadolu'dan munfasıl Halîl Efendi dahi dâr-ı âhirete mürtahil oldu.