Cûybâr-ı merhameti tâb-efgen-i melhûfân-ı zemân ve nehr-i selsâl-i ʿinâyet, seyrâb-kerde-i hâcet-mendân olan Hakān-ı deryâ keff ve beyyinü'ş-şeref hazretleri âsâr-ı Hüsrevâneleri'nden olan bend-i bî-mânendi seyr u temâşâya rağbet ve Karaağaç Sâhil-serâyı'ndan o mahall-i dil-güşâya berren ʿazîmet buyurup, geşt-i bâğ u râğ ve revâyih-i ezhâr-ı müşk-bâr ile taʿtîr-i dimâğ eyleyerek, mevkiʿ-i mezbûra vâsıl derûn-ı safâ-meşhûn-ı Hüsrevâneleri'nde güşâyiş ü inbisât hâsıl olup, hem yân-ı ihsânı bâz ve mülâzim-i rikâb-ı cihân-tâbları olan bendegânı bezl-i direm-i kerem ile kāmet-efrâz-ı beşâşet ü ihtizâz buyurduklarından gayri, bend-i cedîd keşfinin nısf mikdârı ile binâsına bezl ü saʿy u kudret ile izhâr-ı kemâl-i sadâkat eden Çavuş-başı Yenişehirli Osman Efendi'ye on bin gurûş ihsân ve yevm-i mezkûrda mûmâ ileyhi bir sevb-i semmûr ile fâyiku'l-akrân buyurdular.