Menâsıb-ı Devlet-i ʿaliyye'nin ekserîsini ihrâz ve Sadâret-i ʿuzmâ Kethudâlığı'yla dahi kesb-i imtiyâz eden Uzun İbrâhîm Bey'in nahl-i bâsik-ı vücûdu berkende-i tîşe-i nâ-bûdî oldu. Muharremin on ikinci salı günü tavâyif-i askeriyyenin bir kıst mevâcibleri hazîne-i mevâhib-i defîneden ifrâz ve ihsâ ve kabzına me'mûr olanlara teslîm ü edâ olunup aʿlâ ve ednâ bu behâne ile eltâf-ı Şâhâne'den hâyiz-i kıst-i evfây-ı meserret-i bî-intihâ oldular. Leb-i deryây-ı gam-ı fersâda vâkiʿ Karaağaç sahil-serâyının nezâret-i ezhâr-ı behcet-efzâsının eyyâmı ve nedâret-i eşcâr-ı letâfet-bahşâsının hengâmı olduğuna binâ'en, mâh-ı mezkûrun on sekizinci günü Serây-ı ʿâmire'den nakl ü hareket ve o mahall-i bî-bedeli şeref-i makdem-i Şâhâneleri'yle reşk-sâz-ı guref-i cennet buyurdular. Mâh-ı merkūmun yirminci gicesi Haleb Kethudâsı Mehmed Ağa'nın hânesinden zuhûr eden âteş-i zâti'l-vekūd ol taraf ehâlîsini me'yûs-i bûd u ne-bûd etmişiken, yümn-i makdem-i Şehriyâr-ı bedîʿul-âsâr ile etrâfa sirâyetden masûn ve sühûletle vakfa-gîr-i sükûn oldu. Anadolu Kādıʻaskeri Şerîf-zâde es-Seyyid Mehmed Efendi tekmîl-i müddet ve Sadâret-i mezkûre ile Salih-zâde es-Seyyid Mehmed Efendi kesb-i ibtihâc ü beşâşet eyledi. Birkaç gün mukaddem Mekke Pâyesi'yle dilşâd olan Konevî Mustafa Efendi, ʻâzim-i füshat-serây-ı ʻadem-âbâd oldu. Sâl-i ömrü seksen senesine mütenâhiz mahrûru'l-mîzâc ve ölünceye dek kış ve yaz kār ve bûz ekliyle imtizâc ve pend-pezîr-i erbab-ı ʻilac olmayup ʻâkibet sehm-i serîʻu’n-nüfûzâ-i ecele âmâc oldu.