Bundan akdem Mısr-ı Kāhire'ye verilen nizâm ve on mâddeye rabt ile ümerânın verdikleri hüccet ve fî-mâ baʿd mürettebât-ı devletin edâ vü temşiyetinde kusûr etmemek üzere teʿahhüdleri bâlâda güzâreş-pezîr-i kalem-i nâdire-taʿbîr olmuşidi. ʿUhûd-i mezkûreyi üftâde-i tâk-ı nisyân ve kemâ-kân mahsûlât-ı memleketi tâlân ve hevâ vü heveslerine sarf ile girîve-gerd-i vâdî-yi bağy ü tuğyân olduklarından gayri, vâlîleri olan Vezîr Silahdâr Hamza Paşa'yı kendülerini semt-i salâha tergîb etdiği içün mesnedinden tecnîb ve gûnâ-gûn hiyel ü tezvîri mutazammın Der-i devlet-medâr'a ʿarz ve mahzar tertîb etmişler idi. Vech-i meşrûh üzere Mısr-ı Kāhire Vezîr Râkım Mehmed Paşa'ya tevcîh olunup, rahmen lil-ʿibâd mücâzât-ı efʿâl-i nâ-bercâları bu defʿa dahi te'hîr ve ihtiyâr-ı cihet-i inzâr ü tahzîr olunup, şöyle ki, baʿde-zîn şurût-i sâbıkalarını icrâda kusûr ve gılâl-i Haremeyn ve her sene Âsitâne'ye vürûd edegelen Hazîne-i Mısrıyye'nin irsâlinde îrâd-ı ʿözr ü fütûr ederlerse, mukaddemâ tasmîm olunan sûret-i vaʿîd ile te'dîb ve tehdîd olunacağları bu defʿa dahi sâdır olan evâmir-i ʿaliyyede te'kîd olundu.