Müşârun ileyh Karaman Eyâleti'nden ʿazl ve Kars Muhâfazası'na meʾmûr ve külliyetlü dâyire ile o tarafa sevk-i sütûr ve Kars'a duhûlünde askerinin vefretinden ehâlî bî-şuʿûr olup, serhad eşbehlerinden Kara-gülle ve ʿAbū Bayrakdâr ve bunların emsâli serkeşler havfa zâhib ve fitne ihdâsını selâmet-i nefîslerine ihtimâl-i gâlib ʿaddıyla ibtidâ kalʿayı zabt ve sâniyen rişte-i cemʿiyyeti rabt ve müşârun ileyh dahi sühûletle fitneyi teskîn ve müsteşʿir olanları tatmîn dâʿiyesine düşüp, nasîhati ehâlîye ʿadem-i teʾsîr, belki ruʿûnet ve huşûnetlerin teksîr edüp, serâyını sengsâr ve taşın biri müşârun ileyhin kazâ-i hâsırasına îrâs-ı mazârr edüp, ne hâl ise rîş-sefîdân-ı memleket ve kelanterân-ı vilâyet havf-i ʿakıbet ile defʿ-i cemʿiyyet ve izâle-i şûr u fitneye ikdâm ü gayret eylediler. Müşârun ileyh dahi birkaç gün vecaʿ-ı hâsıra ile nâlân ve mübtelây-ı âh u figân olup, müteʾessiren vefât ve terk-i vedîʿa-i hayât eyledi. Kars'ın nizâmı, Van Muhâfızı Mîr-i mîrân'dan Sarı-zâde Mehmed Paşa'ya havâle olunup, kazıyyede medhali ve bu fesâdda eli olanları birer birer ele getürüp, ekserîsini gümnâm eyleyerek ahz-ı sâr ü intikām eylediği, evân-ı tahsîlde Kars ve Van semtlerinde bulunduğumuz hasebiyle reʾye'l-ʿayn meşhûdumuz ve mâdde bu vechile mazbûtumuz olmuşdur. Vezîr-i müşârun ileyh ʿan-asl Çıldır vâlîlerine Dîvân Kitâbeti ve Kethudâlık ederek kesb-i neşv ü nemâ ve Devlet-i ʿaliyye'ye gelüp, Başbâkī-kulluğu ve Çavuş-başılık ve Sadâret Kethudâlığı gibi menâsıb-ı cesîmede tahsîl-i rızâ edüp, giderek nâyil-i Vezâret ve Vâlî olduğu memleketlerde dahi mümkün mertebe rehneverd-i semt-i ʿadâlet [M1 290] olup, etvârı müsellem-i sâhib-i kalem ü rakam, sinnî-yi ʿömrü yetmişe yetmiş bir Vezîr-i Âsaf-meniş idi.