Sadrıaʿzam ve bedr-i efham bu esnâda Sadr-ı esbak ʿAbdullah Paşa'nın oğlu Mehmed Saʿîd Bey'de müşâhede-i liyâkat ü istiʿdâd ve mîr-i mûmâ ileyhi kendüye dâmâd eyleyüp, Şehriyâr-ı sütûde-hisâl mahzâ Sadrıaʿzam'ı taltîf ve kadr ü şânını tazʿîf içün bir sevb-i semmûr ve bir kabza mücevher hancer Berber-başı Ağa ile irsâl ve hatt-ı hümâyûnlarında tebrîk ve istifsâr-ı hâl buyurdular. Zilkaʿdenin yedinci isneyn günü Mesken-i Gāzî ismiyle mevsûm olan kalyonun deryâya tenzîli içün Sadrıaʿzam ve Şeyhulislâm ve Tevkīʿî Paşa hazerâtı ʿale't-teʿâkub Tersâne-i ʿâmire'ye ʿazîmet ile teşrîf-i hümâyûna terakkub etmişler idi. Şehriyâr-ı bahr ü berr dâme mâ-dâme'l-bahrü'l-ahdar hazretleri dahi şeref-resân-ı vürûd ve üç anbarlı nâm sefînede bi'd-devleti ve'l-ikbâl kuʿûd ve vakt-ı muhtâr hulûlünde sefîne-i mezkûre ber vech-i sühûlet deryâya nâzil ve cümlede inşirâh-ı kalb hâsıl olup, müşârun ileyhime kürkler iksâ ve sâyirlere hilʿat ilbâs ve bahşîşler iʿtâ olundu. Haleb eşrâfından olup, kati çok zemândan berü Nekābet ile kesb-i teʿayyün ü şöhret ve giderek tevsîʿ-i dâ'ire-i maʿîşet eden Tâhâ-zâde es-Seyyid Mehmed Efendi'nin kapusu ekâbir ü esâgire küşâde ve Haleb halkına ve sâyire nefʿ-i mazarratından ziyâde iken, mütemevvilân-ı zemâneye gedâ-çeşmân-ı rüzgârın ez-kadîm husûmeti olduğundan gayri, Haleb monlaları dahi mûmâ ileyhe hased ve şiddet-i sevretinden emvâl-i nâsa itâle-i yed edemediklerinden, bâb-ı zemm ü kadhını feth ve dervâze-i mehâsinini sed eyleyüp, o makūle fî kulûbihim merazun olan baʿzı ehl-i garaz tarafından sû'-i hâlî devlete ilkā ve men yesmaʿ yehal kāʿidesi üzere ihrâz etdiği İzmir Pâyesi kaydı terkīn ü ilgā ve nâmı cerîde-i Mevâlî'den hakk ü imhâ ve Edirne'ye nefy ü iclâ olunmuşidi. Kudüs'den maʿzûl pederi Ahmed Efendi Âsitâne'de bulunup, mahdûmu [M1 289] hakkında muktezây-ı hannâniyyet-i übüvvet üzere sû’-i zikr üzere olanları iskât ü ifhâm ve tahrîk ile şey' da'vâ edenleri kavlen irzâ vü ilzâm kaydına düşdüğünden, ol dahi Edirne'ye tagrîb ve belây-ı celâ ile taʿzîb olundu. Sakā Çeşmesi kurbunda vâkiʿ bir Ermeni, şâhid-i zûr ve baʿzı ehl-i şurûr ile cemʿiyyet ve envâʿ-1 fesâda cesâret eylediği mesmûʿ-i evliyây-ı devlet olup, Ermeni-yi mesfûr salb ve o makūle sâʿî bi'l-fesâd olanlara îrâs-ı ruʿb-i kalb olup, dâhil-i cemʿiyyet olan birkaç küştenî dahi Limni Cezîresi'nde kalʿa-bend olunmak içün mübâşire teslîm ve bilâ-emr-i ʿâlî sebîlleri tahliye olunmamak husûsu Dizdâr ve sâyire tefhîm olundu. Mîrahûr-i Evvel-i hazret-i Cihânbânî pîr-i fânî ve müttekî-yi visâde-i nâ-tüvânî olup, Baş-silâhşör Mahmûd Bey, makāmıyla nâyil-i aksa'l-gāye-i emânî oldu.