Memâlik-i fesîhatü'l-ercây-ı Anadolu'da vâkiʿ baʿzı emâkinin muktezây-ı âb ü hâki üzere sevdây-ı şöhret ve teʿayyün ile bir şahs-ı bâhirü'n-naks zuhûr ve dest-res olabildiği mahallere neşr-i bezr-i mefâsid ü şurûr edüp, sahte kâmrânlık ve âyende vü revendeye hemyân-ı fukarâdan mîzbânlık ederek etrâf ü enhâya itâle-i dest ve muʿârızlarının kadrini pest etmek zımnında harb ü kıtâle âheng ve iʿmâl-i seyf ü tüfeng edüp, akviyâ ser-pençe-i kahrında zebûn ve fukarâ vü zuʿafâ zencîr-i tegallübünde ser-nigûn olup, eyyâm-ı istidrâcı zevâle karîn olarak taraf-ı saltanatdan nâgâh kedû-yi mezbelegâh-ı mezellet [M1 286] olan ser-i nühûset-eserine darb-ı tabanca-i âteş-hîz ve havâle-i tîğ-i sertîz kılındığı, hezâr bâr tecribet-güzâr-ı erbâb-ı tedkīk ü temyîz olup, binâ'en ʿalâ zâlik Eğirdir ehâlîsinden Yılânlı Mûsâ dahi o reftâr-ı nâ-hem-vâra sâlik olduğundan, kahr ü istîsâline Aydın Muhassılı Vezîr ʿAbdurrahmân Paşa me'mûr olmağla, Çelik Paşa-zâde'yi üzerine taʿyîn ve levâzımını tanzîm ile hey'et-i ictimâʿiyyesini sedd-i âhenîn eyleyüp, Paşa-yı mûmâ ileyh Eğirdir kurbunda merkūm ile âgāz-ı kıtâl ve miyânelerinde el-harbü sicâlün keyfiyyeti nümû-dâr olarak Musâ, kalʿaya çıkup, mütehassınan müteheyyi’-i cidâl olduğu mûmâ ileyhe maʿlûm oldukda, muhâsaraya şurûʿ u mübâşeret ile vukūʿ bulan keyfiyyeti müşârun ileyhe ʿarz ü işâret eyledikde yerinden hareket ve Eğirdir tarafına tahrîk-i râyet-i hey’et eylediğini bâgī-yi mezkûr istihbâr ve nevâhî-yi Ermenâk'e doğru firâr ve birkaç gün serserî geşt ü güzâr- dan sonra Hâdim Kasabası'na varup, ʿulûm-ı zâhire vü bâtınede kaʿbı ʿâlî olan müteveffâ Hâdim Müftüsü Şeyh Efendi'nin evlâdına ilticâ, anlar dahi Vezîr-i müşârun ileyhden ʿafv-ı cürmünü recâ etmişler idi. Müftî-yi merhûm, müşârun ileyhin Şeyh ve muʿtekadı ve müsellem ve muʿtemedi olduğundan, ʿadem-i müsâʿadeye imkân bulamayup, peyder-pey bâb-ı şefâʿati bâz ve merreten baʿde uhrâ ʿafvını niyâz etmekle, Eğirdir Kasabası'na fîmâ baʿd ʿazîmetden mücânebet ve Hâdim'de ikāmet etmek üzere recâsı karîn-i isʿâf ve merkūm ʿafv ile mazhar-ı eltâf olup, Eğirdir Kasabası ehâlîsi dahi pâ-beste-i nezr-i girân ve merkūmu kasabalarına idhâl eyledikleri hâlde tahsîl-i nezrden başka, her biri mazhar-ı gazab-ı Hakān-ı zemân olacağları bâbında taraflarına hitâben isdâr-ı emr-i celîlü'ş-şân kılındı. Müşârun ileyh irâde-i devleti temhîd ve esâs-ı nizâmı teşyîd etdikden sonra Isparta Kazâsı'na gelüp, vücûduna tareyân-ı ʿillet ve semt-i şehrâh-ı ʿâlem-i bekāya derre-zen-i kûs-ı rihlet ve kişver-füshat-i âbâd-ı hâmûşâna esbrân-ı ʿazîmet oldu. Müteveffây-ı müşârun ileyh Dârende mütemekkinlerinden olup, tefâsîl-i ahvâli mahallerinde mestûr ve tekrârı sebeb-i se'âmet ü fütûr olacağı zâhirdir. Talîku'l-lisân ve nüktedân-ı şedîdü'ş-şekîme, kaviyyü'l-ʿazîme, meʿârif-âşinâ bir Vezîr-i bî-hemtâ idi.