Şaʿbânü'l-muʿazzamın dokuzuncu yevm-i sebt sâʿat dokuzda gülzâr-ı peyveste-i behâr-ı saltanatın bir gonçe-i bûyâsı ve bahr-i şevket ü iclâl-i Hilâfet'in bir dürr-i yektâsı, ser-nümây-ı mekmen-i zuhûr ve Sultân Mehmed ismiyle sahîfe-i ʿâlemde mestûr olup, aʿyün-i Mü'minîn'e ifâza-i pertev-i nûr ve sudûr-i muvahhidîne ilkāy-ı ferah u hubûr eyledi. Velâdet-i bâ-saʿâdetde kānûn olduğu vechile kudûm-i meymenet-lüzûm-i Şehzâde-i civân-tâliʿi tebşîr içün Dârü's-saʿâde Ağası Serây-ı Sadrıaʿzamî'ye vürûd ve teblîğ-i peyâm-ı meserret-endûd eyleyüp, bu müjde-i cihân-behâya mükâfât ve cezâ zımnında muʿtâd olan sunûf-i ʿatâyâ taraf-ı sadru'l-vüzerâdan îfâ olunduğuna müteʿâkib müjde-i revân-bahş-ı velâdet bi'l-cümle erkân-ı saltanata işâʿat olunup, kemâl-i inbisât ile her biri nisâr-ı nakdîne-i iktidâr ve icrây-ı levâzım-ı istibşâr eylediler. Ferdâsı Sadrıaʿzam ve Şeyhul-islâm ve Tevkīʿî Paşa ve Kapudan Paşa ve Sadreyn ve Nakībü'l-eşrâf ve Yeniçeri Ağası Serây-ı hümâyûn'a ʿazîmet ve tebrîk-i velâdet eylediklerinde, mazhar-ı iltifât-ı Şehriyâr-ı ʿâlem ve semmûr kürkler ile münbasit u hurrem oldu.