Kışla sefâyininden biri Bağçe-kapusu'yla Galata beyninde lenger-endâz-ı istikrâr ve hübûb-i bâd-ı muvâfaka talebkâr iken, sâʿat altıda bi-kazâ’illâhi Teʿâlâ derûnundan âteş zuhûr edüp, yerinden hareket ve Galata önünde merbût baʿzı kebîr kayıklara musâdefet ile birkaçını ihrâk ve o mahalden iftirâk ile Cübb-i ʿAlî ile Tüfeng-hâne arasında olan Yehûd hânelere iltisâk ve ol hâneleri ve Cübb-i ʿAlî Çarşusu'nu bi'l-külliyye sûzân ve isâbet-i nâr havfından alarga olan küçük kayıklar Halîc-i İstanbul'un her tarafına müteferrik ve perîşân ve şiddet-i hevâ ve telâtum-i deryâ ekserîsini ifnâ eylediğinden gayri birisi Tersâne önünden mürûr ile Tersâne Serâyı [M1 284] Kasrı'nı yakup, dehşet ilkā ve altı sâʿatden sonra ʿavn-i Îzed-i bîçûn ile bu hâlet-i garîbe sükûn buldu.