Şehzâde-i ferhunde-baht hazretleri fark-ı sevâd ü beyaz ve temyîz-i cevâhir ü aʿrâz derecelerine intihâz buyurduklarından, destyârî-yi zihn-i vekkād-ı mâder-zâd ile taʿlîm-i Kur'ân-ı ʿazîmü'ş-şân'a kesb-i istiʿdâd buyurmalarıyla cumâdelûlânın yirminci mübârek hamîs günü İncûli Köşk pîşgâhında hıyâm ve sâyebânlar nasb olunup, Sadrıaʿzam ve Şeyhülislâm ve Tevkīʿî Paşa ve Sadreyn [M1 279] ve Nakībü'l-eşrâf ve sâyir huzûrları muʿtâd olan zevât-ı kirâm müteʿâkıben gelüp, haymelerine nâzil ve muntazır-ı kudûm-i Şehriyâr-ı bergüzîde-hasâyil oldular. Âsâr-ı makdem-i Şâhâne bedîdâr oldukda, Sadrıaʿzam ve Şeyhülislâm ve sâyirleri kemâl-i huzûʿ u ihtirâm ile vakfegîr-i selâm ve Şehriyâr-ı enâm dahi alay tertîbi üzere süvâr-ı esb-i dilkeş-hırâm olarak kasr-ı mezkûre sâye-endâz-ı tekarrub ve fi'l-hâl Sadriaʿzam otuz hatve mikdârı yerden zemîn-bûs-i te'eddüb olup, seng-i rikâba dek rikâb-ı hümâyûnda devân ve bagal-gîrlik hidmet-i menîʿasıyla mükteseb-i şeref-i firâvân olup, Şehriyâr-ı kerem-me'nûs sadr-ı sürâdikāt-ı iclâle cülûs buyurduklarından sonra haymelerine ʿavdet ve ihzâr-ı taʿâma işâret eyledi. Sadrıaʿzam, Şeyhülislâm and Tevkīʿî Paşa ile bir sofrada ekl-i taʿâm ve sâyirlere dahi başka sofralar kurulup, cümlesi dilsîr-i niʿam-ı Şehriyâr-ı enâm oldu. Maslahat-ı taʿâm hıtâmında Şehzâde-i civân-baht hazretlerini alay ile getürmek içün bi'l-cümle hâzır olan zevât atlarına binüp, Orta kapuda nüzûl ve mâşiyen ʿArz Kapusu'na vusûlleri ihbâr olunduğuna binâ'en, mazhar-ı ser-kerîm olan Şehzâde Sultân Selîm hazretleri pîşgâh-ı devlet-penâhlarında müzeyyen ve maʿnûn pûşîdeli rahle, Lalaları başında ve Dârü's-saʿâde Ağası ve Hazînedâr Ağa yemîn ü şimâllerinde nur gibi pertev-pâş-ı zuhûr olduklarında, Sadreyn ve Nakībü'l-eşrâf ve İmâm-ı Evvel ve Sânî efendiler nâyil-i şeref-i dest-bûs oldukları hâlde mâşiyen pîşgâhlarında revân ve Orta-kapu'da atlara binüp, alay-ı sâbık üzere İncûli Köşk semtine irhây-ı ʿinân ve kasra karîb mahalde Sadriaʿzam istikbâl ve dîdâr-ı fâyizu'l-envârlarıyla kesb-i dest-mâye-i ikbâl eyleyüp, huzûr-ı hümâyûna maʿan duhûl etmeleriyle Sadrıaʿzam ve Şeyhülislâm ve sudûr-ı kirâm hazerâtına ruhsat-ı kuʿûd erzânî kılındığı hâlde Şeyhülislâm Efendi, mukābiline vazʿ olunan rahle pîşgâhında bed'-i besmeleye mübâşeret ve min gayr-i tekellüfin kırâ'et ile dest-i Fetvâ-penâhî'yi takbîl edebine riʿâyet eyleyeceğini müşârun ileyhe teferrüs ile menkib-i ʿâlîlerini bûs ve devâm-ı ʿömr ü devletini îsâl-i karârgâh-ı nâmûs eyledi. Şükran li-hâzihî'n-niʿam Şehriyâr-ı Cem-haşem tarafından Sadrıaʿzam ve Şeyhülislâm ve sudûr hazerâtına ve İmâm-ı Evvel ve Sânî'ye kürkler iksâ ve icrây-ı resm-i duʿâ eden Ayasofya Şeyhi dahi [M1 280] iktisây-ı kürk ile melhûz-i lihâza-i birr-i evfâ oldu. Bundan sonra herkes haymesine gelüp, istirahât ve yine alay ile Şehzâde-i saʿîdü't-tâliʿ hazretlerini istikbâl etdikleri mahalle dek îsâl ve fi'l-hâl ağayân-ı Harem o nev-nihâl-bâğ-ı saltanatı makām-ı ʿâlîlerine idhâl eyleyüp, bundan sonra erbâb-ı alaya icâzet ve ʿavdetlerine ruhsat verildi. [Mısra]: Bed'-i bismillâh-ı Kur'ân eyledi Sultân Selîm (بدأ بسم الله قرآن ايلدي سلطان سليم) bu meclis-i akdese târîh vâkiʿ olmuşdur.