Moskov tâ'ifesi Gilan ve Derbend ve Taygān münâsebetleriyle Gürcistân'a mücâvir olup, ittihâd-ı mezheb ve tevâfuk-i meşreb ile miyânelerinde i’tilâf peydâ ve menâʿat-i emkine mahkûmiyyetden vâreste olmağa, ʿillet-i akvâ olduğunu inhâ ve iktizâ eylediği hâlde asker ve akça ve mühimmât ile iʿânet edeceklerini vaʿd edüp, bu sırr-ı lâzimü'l-kitmânı miyânelerinde ihfâ etmişler idi. Gürcistân halkı Moskovlu'nun kelâm-ı vahîmü'l-encâmını mahz-ı nasîhat ʿadd edüp, refte refte Çıldır vâlîlerine dayanup, be-her sâl vere geldiklerini gâh nâkıs ve gâh temâm vererek mümâtaleye mübâşeret ve giderek bi'l-külliyye vergilerini katʿ ile izhâr-ı husûmet ve hılaʿ-i ribka-i itāʿat eyledikleri, serhadlerden gelen tahrîrâtdan müstebân olup, irgām-ı unûfleri zımnında Trabzon Vâlîsi Vezîr ʿAbdurrahmân Paşa, üzerlerine asker-i kesîf ile taʿyîn olunmuşidi. Müşârun ileyh Gürcistan'a vardıkda, ehâlî saʿbü's-sülûk cibâl-i şâhikāta firâr ve çok geçmeden eyyâm-ı şitâ dahi hulûl edüp, müşârun ileyh ʿavdete karâr ve hezâr suʿûbet ü meşakkatle Çıldır Eyâleti'ne çıkup, Gürcüler'in ʿakab-gîrleri ve şitânın şiddeti asker-i İslâm'a haylî tezâyuk u nefâr vermişidi. Ülke-i mezbûrenin pezîrefte-i hüsn-i nizâm olması, matlûb-i Şehriyâr-ı enâm olduğundan, Çıldır Vâlîsi Vezîr Hasan Paşa'nın o havâlî umûruna vukūf u ittılāʿı sâyirden ziyâde ve Serʿaskerliği ittifâk-ı ârâ ile karârdâde olup, menşûr-i Seraskerî tarafına irsâl ve maʿiyyetine me'mûr olacak ʿasâkir ve zehâyir dahi tertîb olunup, evvel-behârda tâ'ife-i mezbûra üzerine sevk-i ebtâl-i ricâl eylemesi diğer emr-i ʿâlîde tafsîl ü icmâl olundu.