cesâret-i müfrita ile meşhûr ve ʿâkıbet-i hâli mülâhazadan dûr olmak hasebiyle hudûdda tahte'r-remâd istitâr olan nâr-ı fitneyi îkād ve şurût-i musâlahayı ifsâd eyleyeceği ihtimâlâtından fazla tekâlîf-i şâkka ile devleti tasdîʿ ve metâlib-i nâ-bercây-ı nâsı iltizâm ile nezd-i devletde olan vakaʿ u nüfûzunu tazyîʿ edüp, [mısra]: Ve men yüksiru't-tesâʾele lâ büdde yahrum mefhûmunu zarûrî iktisâb ve mesned-i Hânî'den sukūtunu herkes istisvâb edüp, Kethudây-ı Bevvâbîn-i hazret-i Şehriyârî taʿyîn ve müşârun ileyh Kırım'dan ihrâc ve Sakız'da temkîn olunup, mesned-i Hânî'ye şâyân görülen Selîm Girây Hân'ı Âsitâne'ye îsâl zımnında Kapucu-başı [M1 265] Süleymân Ağa irsâl olundu. Hasan Paşa Tütüncüsü dimekle meşhûr Kapucu-başı ʿAbdî Ağa, bundan akdem İsakçı Anbâr Emîni olup, Hân-ı maʿzûle istinâd ile ʿibâd-ı zaʿîfü'l-eyâdı berbâd ve mutâlebât-ı ʿanîfe ile evtân-ı kadîmelerinden perâkende ve ibdâd etmişidi. Hân-ı maʿzûl vaktinde harekât-ı nâ-hemvârı hazm olunup, ʿazl olunduğu ân Yedikulle'ye habs ve iʿdâm ve re's-i maktûʿu mevzûʿ-i ʿibretgâh-ı hâss u ʿâmm kılındı. Belgrad Vâlîsi Kapudan-ı sâbık Vezîr Mehmed Paşa'ya Rakka Eyâleti ve İç-il Mutasarrıfı Vezîr Mustafa Paşa'ya, Belgrad Muhâfazası tevcîh olundu. Kıbrıs Muhassılı Çil ʿOsmân Ağa'nın üzerine cezîre halkı hücûm ile muhârebede merkūm maʿdûm olup, keyfiyyet ehâlî tarafından inhâ ve maktûlün mezâlimi taʿdâd ü ihsâ olunmuşidi. Tatmîn-i reʿâyâ ve teskîn-i âteş-i gavgā zımnında sâbıkā Topçu-başı Mustafa Ağa ve Müvellâ o tarafa isrâ olunup, fi'l-hakīka Muhassıl'ın kesret-i zulmü ehâlîyi bu kâr-ı mekrûha ilcâ etdiğini mübâşir ve Müvellâ ʿarz-ı pâye-i serîr-i aʿlâ etdiler ise dahi Muhassıl'ın tamaʿ ve zulmü devlete tahrîr ve iktizâsına göre bu tarafdan te'dîb ü taʿzîr lâzım iken, îkāz-ı fitne ile zâbitân-ı devlete itâle-i yed cürm-i sarîh ve bir fi'l-i kabîh olup, cezîrenin nizâmı ve sebeb-i şûriş olanların iʿdâmı, siyâset-i mülkiyeden maʿdûd olmağla, şimdilik kabâhatlerinden iğmâz-ı ʿayn ve vaktiyle gûşmâl ve teʾdîbleri zimmet-i devlete deyn kayd olundu. Kadırga Limânı ahurunda kesret-i cemâʿat-i Müslimîn olup, cemâʿatle salât edâsından muhrûm ve bir mescid binâsı beyyinü'l-lüzûm olduğundan, taraf-ı hümâyûndan mahall-i mezkûrda bir mescid-i sagīr binasına mübâşeret ve Cumâdelâhıre'de tekmîline himmet olunup, imâm ve mü’ezzini tanzîm ve sâyir levâzımı tetmîm olundu.