Yeniçeri Ağası ʿazl ve Tekfurdağı'na iclâ ve Kul Kethudâsı Ağalık ile kâm-revâ kılınup, silsile-i ocağ üzere Zağarcı-başı, Kul Kethudâsı ve Seksoncu, Zağarcı ve Turnacı, Seksoncu ve Muhzır Ağa, Turnacı-başı taʿyîn ve menâkib-i istihkākları hılaʿ-i zâhire ile tezyîn olundu. Şehr-i rebîʿulâhırın onuncu günü cünûd-i muvahhidînin bir kıst mevâcibleri hazîne-i mevâhib-defîne-i Şâhâne'den ifrâz ve me'mûrlara tevdîʿ ve Paşa-kapusu'nda dahi süvârî ocağlarının ʿulûfeleri tevzîʿ olunup, baʿde'd-devr taraf-ı hümâyûndan şerefrîz olan teşrîfât-ı seniyye kadr-i Sadrıaʿzam'ı terfîʿ eyledi. Mevsim-i deryâ güzerân olduğuna binâʾen, Ak-deniz'e kapudan olan Vezîr Mehmed Paşa, Donanma-yı hümâyûn'u mahsûben bi's-selâme mersây-ı Tersâne'ye îsâl ve huzûr-i Sadrıaʿzamî'ye gelüp, telebbüs-i hilʿat ile mâye-i şeref istihsâl eyledi.