Şehr-i mezkûrda Ak-deniz'e ihrâcı tasmîm olunan Donanma-yı hümâyûn'un kâffe-i levâzımâtı tetmîm ve Kapudan Paşa alayını tanzîm ile Yalı-köşkü'ne gelüp, hilʿatini iktisâ ve resm-i vedâʿı takdîm edüp, bir iki gün Kabataş pîşgâhında vazʿ-ı lenger ve cânib-i Bahr-i sefîd'e sefer eyledi. Pâdişâh-ı pür-intibâh dâme fî kelâ'eti'l-İlâh hazretleri Kara-ağac Sâhil-serâyı'na meyl ü rağbet ve zilkaʿdenin yirminci günü o mahall-i bî-bedele nakl ü ʿazîmet buyurdular.