Sadr-ı mütevaffâ etbâʿından olup, sâbıkā Kıbrıs Muhassılı ve el-yevm Matbah Emîni olan ʿAcem ʿAlî Ağa'dan Kıbrıs reʿâyâsı ʿarz-ı hâl ve zulm ü teʿaddîsi sebebi ile garâmet-i mâliyyeye giriftâr olduklarını tafsîl ü icmâl eylediklerinden başka efendisi Sadâret'de ve merkūm dahi nazar u rağbetde bulunup, baʿzı kimseler mûmâ ileyhe ilticâ ve maslahatlarını reviyyet ile ʿarz-ı hedâyâ etmişler idi. Hezâr niyâz ile iʿtâ eylediklerini cebren ahza haml ile istirdâd-ı meʼhûz istidʿâsında oldukları mû-be-mû maʿlûm-i Şehriyâr-ı cihân-ârâ olmağla, mezbûr ʿibret-i enâm olmak içün hüsâm-ı siyâsetle iʿdâm ve gümnâm kılınup, Matbah Emâneti ile tekrâr Hasekî Mustafa Ağa hâyiz-i rehîne-i mesârr oldu. Merkūm ile ahz u iʿtâda müşterek ve gûyâ-yı en-nısfu lî ve'n-nısfu leke olan Kazar nâm sarrâf ki sadr-ı mütevaffânın hidmetinde idi. Ol dahi katl ve cehennemîlere vasl olundu.