Müşârun ileyhin birkaç günden berü mübtelâ olduğu sû-i mizâc kābil-i müdâvâ vü ʿilâc olmayup, şehr-i ramazânın yirmi dördüncü cumʿa gicesi sâʿat dokuzda iken vefât ve tekmîl-i enfâs-ı hayât eyleyüp, Sultân Mehmed Câmiʿi'nde nemâzı edâ ve Kitâb-hânesi'nde iʿdâd eylediği mezarda o düstûr-i vakūr aʿyün-i nâsdan ihfâ olundu. Sad hayf ki, Ol cevher-i nâ-yâb kemâlât-ı sertâc-ı cihân iken olup hâke fütâde, bir serv-i ser-âzâd idi bâğ-ı hünerde berkende edüp, ʿömrünü seylâb-ı irâde. Bundan akdem rütbe-i refîʿa-i Vezâret ihsân olunan Hamza Hâmid Paşa, mütevaffâ-yı müşârun ileyhin marazı hâlinde umûr-i ʿibâdı ru’yete meʼmûr ve hall-i İlâhî zuhûrunda Vezîr-i aʿzam olmak hâtırası sahîfe-i zihn-i Pâdişâhî'de mestûr olmuşidi. Yevm-i mezkûrda huzûr-i hümâyûna da'vet ve dest-i emânetine teslîm-i mekālîd-i umûr-i devlet kılınup, Bâb-ı âlî'ye ʿavdet ve erbâb-ı menâsıba [M1 222] ʿale'l-ʿumûm ilbâs-ı hilʿat eyledi.