Mısır'da merhûm olan Bekir Paşa'nın necl-i güzîni ʿAtâ'ullâh Beyefendi, dâhil-i silsile-i Hâcegân-ı Dîvânî olup, Gümrük Emâneti'nde katʿî çok zemân müstekarr olan İshak Ağa dahi terk-i ʿâlem-i fânî ve dâmâdı Ahmed Efendi, Gümrükcülük ile pâ-nihâde-i mastaba-i kâmrânî oldu. Mûmâ ileyhin mutasarrıf olduğu Kitâbet, Ağa-yı Dârü's-saʿâde-i sâbıkı Bey Halîfe'de karâr-dâde oldu. Anadolu Eyâleti, birkaç gün mukaddem Eğriboz tevcîh olunan Vezîr dâmâd Hüseyin Paşa'ya tevcîh ü ʿinâyet ve selefi Kapu-kıran Vezîr Mehmed Paşa, Erzurum Eyâleti'ne şukka-güşây-ı ʿazîmet olup, bunun dahi selefi Vezîr İbrâhîm Paşa, Kars muhâfazasına taʿyîn ü isrâ olundu. Çığala-zâde [M1 221] serâyı ittısâlinde vâkiʿ Köprülü-zâde konağını ve sâyir o havâlîde olan mahalleri ve Yeşillü-oğlu serâyını Şehriyâr-ı Felâtûn-ârâ sâhiblerinden ziyâde nakd ile iştirâ buyurup, benât-ı semiyyetü's-sıfatlarından iki dürr-i girân-behâya sadef ve dü-şems-i âsumân-ʿismete beyteyi'ş-şeref olmak irâdesiyle binâsını emr ü fermân ve Hâşim ʿAli Bey, Emânet-i Ebniyye ile fâyiku'l-akrân kılındı.