Rebîʿulevvelin yirmi yedinci günü cevv-i hevâ ve beyne'l-arz ve's-semâda raʿd ü berk-ı şedîd zuhûr ve tarrâka-i cân-hırâşı herkesden selb-i şuʿûr edüp, müstaʿlî mahallere nüzûlü mücerreb olduğundan, Sultân Bâyezîd Câmiʿi menâresine nüfüz etdiyse dahi zarar etmeksizin mündefiʿ ve bu savt-ı mehîbden erbâb-ı lehv ü hevâ münzecir ü mürtediʿ oldu. Şehr-i mezkûrun yirmi dokuzuncu günü sâʿat-i nehârî ikiyi yedi dakīka mürûrunda kurs-i şems-i münevver ʿârıza-i küsûf ile bî-tâb ü fer olup, on beş dakīkadan sonra karîn-i incilâ ve ʿâlem pür-zıyâ oldu. Mâliyye Tezkirecisi olan Nûrî Efendi, berzah-ı peymây-ı ʿadem ve selefi Hüseyin Efendi, mansıb-ı mezkûr ile hurrem oldu.