Saferu'l-muzafferin on sekizinci günü Ayasofya Şeyhi vefât edüp, tarîkleri üzere silsileleri tertîb ve cümlesi tatyîb olundu. Müteveffây-ı mûmâ ileyh fenn-i hadîs ve tefsîrde yegâne ve vaʿz u tezkîrde İbn Cevzî-yi zemâne idi. Mahdûm-i hazret-i Fetvâ-penâhî Nûrullâh Efendi'ye ve diğer mahdûmları ʿAtâullâh Efendi'ye tefâvüt-i cüzviyye ile Mekke pâyeleri ihsân olundu. Beyʿ içün ʿarz olunmuş bir câriye-i bed-tebâr, esircinin ʿiyâlini bıçak ile katl etdiğini lisânıyla ikrâr edüp, pelâs-pâreye melfüfen esîr bazarı kûşesinde berdâr ve sâyirlere medâr-ı iʿtibâr kılındı. Şehr-i mezkûrda Bostâncı-başının hidmetinden nefret geldiğine binâʾen, Hasekî Ağa olan İspir Ağa, mansıb-ı mezkûr ile kesb-i rifʿat eyledi. Hâcegân-ı Dîvân-ı hümâyûndan Nâyilî Paşa-zâde Mîr Şâkir'in ömrü âhir ve târîh-i mezkûrda mücâvir-i mekābir oldu. Mîrahûr-i Evvel olan Reşîd İbrâhîm Ağa, bu hılâlde vefât eden Vezîr Saʿdeddîn Paşa'nın muhallefâtına meʾmûr olmuşidi. Ruha'ya vardıkda ömrü vefâ etmeyüp, ʿâlem-i fânîden izhâr-ı tebâʿud ü tenezzüh edüp, Bi-zâ kazeti'l-eyyâmü mâ beyne ehlihâ