Rumeli Kadıʿaskeri olan Ebûbekir Efendi-zâde ʿOsmân Efendi, bir sene kadar icrây-ı hükûmet ve tekmîl-i müddet eyleyüp, sâbıkā Rumeli Kadıʿaskeri Pîrî-zâde ʿOsmân Monla Efendi, şaʿbânın yirmi dördüncü günü o mesned-i celîl ile tebcîl olundu. Ramazân-ı şerîfin on beşinci günü ʿâdet-i dîrîn-i Devlet-i ebed-karîn üzere ʿuzamây-ı devlet telsîm-i hırka-i şerîfe ile iktisâb-ı kemâl-i feyz ü meymenet eyleyüp, ʿîd gicesi dahi resm üzere Serây-ı hümâyûn'a varılup, erbâb-ı muʿâyede hâk-i ʿatebe-i Tâcdârî'ye rû-nihâde oldular.