Kāhire-i Muʿaziyye'de bir müddetden berü Vâlî olan Vezîr Kâmil Ahmed Paşa, pey-der-pey gılâl ve hazîne ve tertîbât-ı Mısrıyye'ye dâʿir şeref-vürûd olun hutût-i hümâyûnun tenfîz ü icrâsına berzede-dâmân-ı saʿy ü ihtimâm olduğunu havene-i ümerâ tehammül edemeyüp, kāʿide-i fâsideleri üzere müşârun ileyhi tenzîl ve ümerâdan birini Kāyim-makām nasb etmek ʿâdetleri iken, mukaddemâ Cidde Sancağı tevcîh olunup, ilâ hâze'l-ân Mısır'da mukīm Sadr-ı esbak Mustafa Paşa'yı tevkîl etdikden sonra musannaʿ ve müzevver ʿarz u mahzar ile birkaç nefer âdemlerini Âsitâne'ye tesyîr etmişler idi. Mâdde-i mezkûre takdîm-i ʿatebe-i ʿaliyye kılınup, lede'l-meşvere râbıtası verilmek emr-i hümâyûn olduğuna binâ'en, Şeyhulislâm ve sudûr-i kirâm ve ocağ ağaları ve ʿuzamây-ı ricâl Bâb-ı ʿâlî'de ictimâʿ ve vukūʿ bulan keyfiyyeti müştemil vârid olan tahrîrâtı istimâʿ ʿakabinde Mısır, Haleb Vâlîsi Vezîr Bekir Paşa'ya ve Haleb, Mustafa Paşa'ya verilmek hulâsa-i meşveretleri olmağla, lede'l-ʿarz ve'l-istîzân iʿlâm-ı hâl zımnında müşârun ileyhimâya ve Mısırlu'ya ısdâr-ı fermân-ı ʿâlî-şân kılındı.