Bâlâda zikr ü beyân olunduğu vech üzere Kethudây-ı sâbık Hamza Efendi'ye Sadrıaʿzam'ın kemâl-i teveccühü olup, bu defʿa mesnedinden infisâlini her ne kadar zarûriyyât-ı vakt îcâb etmiş ise dahi merâret-i ʿazl ile telh-kâm olacağı mütehakkak olduğundan, Efendi-yi mûmâ ileyhi huzûruna getürdüp, kalb-i münkesirini mülte'im-i mûmyây-ı tesliyyet ve hilâf-ı ʿâde bir sevb-i semmûr kürk ilbâsıyla küşâde-rûy-i ferhat eylediğinden başka, Nişancılık mansıbını dahi ʿilâve-i lutf u mürüvvet buyurup, birkaç gün mukaddem Nişâncılık tevcîh olunan Bekir Bey, mübtelây-ı renc-i herem ve vücûdu ke'l-ʿadem olup, dîvâna gitmekden ʿâciz ve ihtiyârlığı her matlabına hâciz olmağla, mûmâ ileyhin hâtırı dahi isticlâb olunmak lâzime-i şîme-i mürüvvet olmağla, mikdâr-ı vâfî ʿatıyye ile ikrâm ve hayır duʿâsı igtinâm olundu. Cebeci-başı Eyyûbî Mustafa Ağ'nın rehâvet ü tekâsülü ʿazlinin mahmili olup, saferü'l-hayr evâ'ilinde Gelibolu'ya iclâ ve birkaç defʿa Cebeci-başı olup, el-yevm Silahdâr Ağalığı ile kâm-revâ olan Kadrî Ağa-zâde, mansıb-ı mezkûr ile tefrîh ve Silahdâr Ağalığı'na, Hasan Paşa dâmâdı ʿAbdî Ağa [M1 203] tercîh olundu. Cebecîler Kâtibi olan Mîr Râcih semt-i âhirete râyih ve mansıbı ile İmâm Hasan Efendi, mazhar-ı lutf-i Pâdişâh-ı ʿamîmü'l-menâyih oldu. Nekābet'den maʿzûl İdrîs-zâde Efendi'nin tâyir-i rûhu âşiyâne-i bedenden hurûc ve sûy-i semâya ʿurûc eyledi.