Zilkaʿde gurresinde Şehriyâr-ı nîkûkâr temâşây-ı sunʿ-ı Perverdigâr zımnında Kara-ağac Sâhil-serâyı'nı kudûm-ı meyâmin-lüzûmlarıyla reşk-fermây-ı müntezehât-ı çâr-gâne-i rûzgâr buyurdular. Târîh-i mezkûrda Âsitâne-i saʿâdet'de mukīm olan Vezîr Silahdâr Mehmed Paşa mansıbı olan Kütahya'ya ve Tevkīʿî Vezîr Küçük Mustafa Paşa, makarr-ı hükümeti olan Mora'ya ve Muhsin-zâde Vezîr Mehmed Paşa, kürsî-yi Eyâleti olan Bosna Travniki'ne ʿazîmete meʾzûn ve birer birer hareket ile mümtesil-i emr-i hümâyûn oldular. Kapucu-başılardan ʿAbdî Ağa, Başbakī-kulu nasb olunup, Sâliha Sultân Kethudâsı ve Lâleli Binâ Emîni ʿAli Ağa istiskāl ve hisâbı baʿde'r-ru’ye Kıbrıs Muhassıllığı ile o tarafa irsâl ve Câmiʿ-i mezkûr nezâreti ile Kethudây-ı esbak Yûsuf Efendi ibcâl olundu. Ayasofya Tevliyyesi, Tâhir Ağa'dan nezʿ ve Sadrıaʿzam Vekîl-i harcına defʿ olunup, Sâliha Sultân Kethudâlığı dahi Sadrıaʿzam Kapucular Bölük-başısı ʿOsmân Efendi'ye tefvîz ve etbâʿ-ı Sadâret-penâhî'den ʿAbdurrahmân Efendi vefât eden Topçular Kâtibi'ne taʿvîz olundu. Sâbıkā Bosna Vâlîsi Vezîr Mehmed Paşa'dan ehâlî-yi Bosna iştikâ edüp, Vezâret'i refʿ ve Resmo'ya iclâ olunmuşidi. Mezâlim ü teʿaddiyâtı derece-i ʿafvı tecâvüz eylediğine binâʾen, emr-i kazâ-mazâ ile izâle olunup, ser-i felâket-zedesi mevzûʿ-i ʿibretgâh-ı aʿlâ vü ednâ kılındı. Deyn-i matlûb içün mahbes-i Yedi-kulle'de mescûn ve menkûb olan Kostantîn Voyvoda kayd-ı habsden âzâd ve Eflâk Voyvodalığı ile ber-murâd oldu. Boğdan Voyvodası müsinn ü ihtiyâr ve idâre-i hidmetden ʿâciz ve bî-zâr olduğu âşikâr olduğundan maʿzûl ve oğlu yerine mevsûl oldu.