Müşârun ileyh Akhisar'da mütemekkin Şeyh Mecdüddîn neslinden olup, [M1 199] kuvve-i asliyye ile bi'l-cümle ʿulûmu muʿâsırı olan ʿulemâdan ahz u telakkī ve Âsitâne'ye gelüp, Kara Halîl Efendi'ye intisâb ile dârü'l-ifâdesinden tahsîlât-ı sâbıkası kesb-i terakkī eyleyüp, hidmet-i iʿâdelerinden mülâzemete nâyil ve müellefât-ı erbâʿayı şâmil bin yüz on bir târîhinde vâkiʿ imtihanda bi'l-istihkāk Medrese ru’ûsuyla mahsûd-i emâsil olmuşidi. Üstâdları fâzıl-ı müşârun ileyhe dâmâd ve bu vechile hâne-i vîrân-şüde-i âmâli maʿmûr u âbâd olup, giderek devre-i muʿtâdeyi ikmâl ve Selânik mansıbı ile te'sîs-i mebânî-yi âmâl ve yüz kırk târîhinde Mısr-ı zâtü'l-ehrâm Kazâsı'yla ikrâm olunmuşidi. Bir sene o diyârda neşr-i âsâr-ı hükûmet etdikden sonra Âsitâne'ye ʿavdet edüp, İran halkının muʿtekidleri olan Mezheb-i Caʿferî hususunda hâdis olan şübhe ve işkâli izâle kasdıyla, Âsitâne-i saʿâdet'den birkaç nefer ʿulemây-ı Ehl-i Sünnet'in huzûrlarını Nâdir Şâh iltimâs eylediğine binâ'en, Kara Mehmed Paşa-zâde Vezîr Mustafa Paşa, o tarafa sûret-i sefâretde me'mûr ve sâhib-i terceme ve Şalğamcı-zâde ve Dîvân Kitâbeti ʿunvânıyla mülakkab Sâlih Efendi, bi'r-refâka ʿâzim-i savb-ı mezkûr olmuşlar idi. Kandehar ve Semerkand ve Sıfahan semtlerinde imrâr-ı ezmân ve İrâniyân ile kadh-ı zinâd-ı ʿilm ü ʿirfân ve fazl ü kemâllerini cümlesi istihsân etmişler idi. İnkızây-ı maslahat ile Âsitâne-i saʿâdet'e ʿavdet ve Sadâret-i Anadolu ile nâyil-i ferhat olup, yüz elli beş târîhinde maʿzûl ve yetmiş iki senesinde Sadâret-i Rumeli ile vâsıl-ı ser-menzil-i me'mûl olup, altmış beşde tekerrür ve mesned-i Sadâret'e tesaddur ve altmış sekiz târîhinde Şeyhulislâm ve Müftiyyü'l-enâm olmuşlar idi. Zaʿf-ı pîrî ʿilletiyle beş mâhdan sonra ʿazl olunup, Mîrgûn-oğlu sâhil-serâyında bast-ı bûriyâ-yı ikāmet ve zilkaʿde evâyilinde ihtiyâr-ı sefer-i âhiret eyledi. Mevt-i ʿâlim mevt-i ʿâlem intikāl intikāl (موت عالم موت عالم انتقال انتقال) lafz-ı mükerreri ve Müverrih Hâkim Efendi'nin, [mısra]ʿ: Etdi ʿAbdullah Efendi cennet-i ʿadnı makarr (ایتدی عبدالله افندی جنت عدن مقر) mısraʿ-ı cevher-dârı târîh-i vefâtlarıdır. Müşârun ileyh ʿömr-i sad-sâle ile inşâd-ı şiʿr ve tahrîr-i risâleden bir ân hâlî olmayup, hevâmiş-i kütüb-i muhtelifü'l-üslûbda binit fikri olan tedkīkāt gazâret-i ʿilm ü fazlına min akva'l-emârât olup, ʿunvânü'ş-şerefi tezyîl ve bin beş yüz beytden mütecâviz Behcet-nâme'si ve fenn-i kelâma dâ'yir risâle-i mahsûsası ve hatt-ı taʿlîkde olan hüsn-i edâsı, vâreste-i şâ'ibe-i tenkīs ve taʿlîldir. ʿAbdî ve Vassâf mahlaslarıyla tehallus [M1 200] edüp, bu iki beyt zâde-i tabʿ-ı meʿârif-nebiʿleridir: Bilinmez ʿârifin fevtinden evvel kadr-i âsârı Mihakk-ı hâk ile sencîdedir hüsn-i hired şimdi Ve lehû: Tenezzül eyleyemem hep fühûl iken mahzâ Berây-ı fahr-ı muhâkâta fazl-ı âbâyı