İdrîs Köşkü kurbunda Hâcegân-ı Dîvân-ı hümâyûn'dan Murtezâ Efendi merhûmun binâ etdiği tekkede seccâde-nişîn-i irşâd ve zâviye-güzîn-i ʿibâdet-i Rabbü'l-ʿibâd olan Kâşgarî ʿAbdullah Efendi, saferin yedinci gicesi sunʿ-i nakş-bend-i ezel olan câme-i gülgûn-tırâz-ı hayâtı çâk-çâk-i dest-i ecel olup, cesed-i şerîfi kenâre-i tekye-i mezkûrede defîn-i hâk-i ʿıtr-nâk oldu. Şeyh-i müşârun ileyhin zâhir u bâtını maʿmûr ve kalb-i tâbnâki mehbit-i envâr-ı esrâr-ı kümûn u zuhûr olup, seyr ü sülûkü resîde-i derece-i gāyet ve ʿulûm-i zâhirede mehâreti vâreste-i kayd-ı işâret, mirtâz u müteheccid ve tûşe-i kanāʿatle mütezevvid bir zât-ı kerâmet-simât idi. Ekser vakitleri keşf-i setâyir-i Mesnevî-yi şerîf ile güzerân ve baʿzan tedrîs ile mürde-dilân-ı rüzgâra bahş-ı râhat-ı cân edüp, kabûle sezâvâr eşʿâr-ı dilârâsı ve baʿzı resâyil-i feyz-bahşâsı manzûr ve her fenden haberdâr olduğu âsârından maʿlûm-i erbâb-ı şuʿûrdur.