Defterdar-ı Şıkk-ı Evvel olan İbrâhîm Efendi, [mısra]: Ve men yaʿiş yelka devâhî'l-meşîb mefhûmu üzere kerem ve serd-i rûzgârı tecribe vü ihtibâr etmişiken; “Baʿzı umûr-ı muhdese ihtirâʿıyla devlete hidmet ve Pâdişâh'a tahsîl-i kurbiyyet ederim" deyü Sadrıaʿzam hâssı olan Kıbrıs'ın mîrî tarafından ilzâmına ʿamel ve müşârun ileyhe bir başka mahall-i bedel etmek zumunda olduğu maʿlûm-i Sadr-ı ecel olduğu ân ʿazlini takrîr ve me'al-i: İnʿâdeke'l-vezîru lem yenfaʿke'l-emîru mefhûmu hakkında sûret-i pezîr oldu. ‘Alâ'iyye Paşalığı'ndan tehâfüt ile hânesinde ârâmgîr olan el-Hâc Ahmed Efendi, o makām-ı hatîr ile tevkīr oldu. Reîsü'lküttâb olan ‘Abdullah Efendi, lâ yenfaʿu li'ş-şerri ve lâ li'l-hayr ise dahi riyâseti ʿarz gibi kāyim bi'l-gayri olup, başlı başına bir takrîr yazmakdan ʿâciz ve muztar ve serâyir-i devlete sefele-i küttâb bi'z-zarûre mahrem olacağı mukarrer olduğuna binâ'en, zilkaʿdenin ikinci günü ʿazl ve fazîlet ve bâhiresi müsellem-i erbâb-ı dirâyet ü ʿakl olan re'îs-i sâbık Kâşif Mehmed Efendi hidmet-i mezkûreye nakl olunup, Çavuşbaşı Hatîb-zâde dahi ʿan-asıl galîz u fazz ve hidmetinden Sadrıaʿzam istîfây-ı haz eylediğinden o dahi maʿzûl ve eʿâzım-ı ricâl-i devletden Hamza Hâmid Efendi yerine mevsûl oldu.