Mûmâ ileyh Filibe hânedânından olup, ihrâz-ı menâsıb ve katʿ-ı merâtib niyyeti ile Âsitâne'ye gelmişidi. Defterdâr-ı nâmdâr olan Halîmî Paşa'ya, rabt-ı peyvend teʿalluk ve giderek emsâline tefavvuk edüp, Edirne ve Sofya ve o havâlînin ʿale'l-ʿumûm kasabât ve kurâsı mübâyaʿasını derʿuhde vü iltizâm ve behâlarını cânib-i mîrîden ahz ü istîfâ ile tahsîl-i merâm eyleyüp, kendüsi bizzât bu mesâlihin ru'yetine kāyim ve Halîmî Paşa'ya istinâd ile zulm ü teʿaddîye mülâzim ve kati çok meblağ fukarâdan tahsîl ve esbâb-ı dârât ü ihtişâmını gereği gibi tekmîl etdikden sonra Âsitâne-i saʿâdet'e vürûd ve Matbah Emâneti ile isbât-ı vücûd etmişidi. Müstenedi ber-taraf ve kendüsi bâd-be-keff olmağla, Filibe'ye iclâ ve o hilâlde tîşe-i zulm ü cevriyle dilharâb olan reʿâyâ rikâb-ı kamer-tâba iştikâ ile teşvîr-i gazab-ı Pâdişâhî eylediklerinden, Âsitâne'ye ihzâr sûretinde Edirne'ye lede'l-vusûl Bostâncı-başı maʿrifetiyle maktûl ve emvâl ü eşyâsı hazîne-i Pâdişâhî'ye mevsûl oldu.