Bundan akdem Şıkk-ı Evvel Defterdârı olup, rütbe-i Mîr-i mîrânî ile ʿAlâʾiyye Sancağı'na ibʿâd olunan el-Hâc Ahmed Paşa, Âsitâne-i saʿâdet'e gelüp, hânesinde ikāmet zımnında dest-bâz-ı niyâz ve recâsı karîn-i müsâʿade-i Şehriyâr-ı bende-nüvâz olduğuna binâʾen, Mîr-i mîrânlığı refʿ ve Âsitâne'ye gelmesi bâbında sâdır olan emr-i ʿâlî kendü âdemîsine defʿ olundu. Receb-i şerîfin on birinci günü Surre-i hümâyûn, Emîni olan Hasan Ağa'ya teslîm ve ber-kadem-i akdem kāfile-i huccâc ile ʿazîmeti matlûb-i Pâdişâhî olduğu tarafına tefhîm olundu. Arpa Emîni olan Temrî Mehmed Efendi'nin nahl-i ömrü üftâde-i sarsar-i ecel ve mansıbı ile Hasekî Mustafa Ağa bâlâr u ser menzil-i emel oldu. Mûmâ ileyh devr-i Ahmed Hânî'de Beylan Tevliyyeti ile çırâğ olup, bu devr-i bî-cevre gelinceye dek mukīm-i kûşe-i ferâğ ve kanāʿat-kerde-i ednâ bülga-i refâğ olmuşidi. Şehriyâr-ı ʿâlem taht-ı hümâyûn-baht saltanata vazʿ-ı kadem buyurduklarında muʿârefe-i kadîme sebebi ile tezekkür ve huzûr-i hümâyûnalarına getürdüp, nukūd ü ilbâs ile mûmâ ileyhi tehî-sâz-ı dâmen-i vecîb-i teşekkür buyurduklarından gayri Galata Voyvodalığı'yla tatyîb ve esâs ve dârâtını taraf-ı Mülûkâne'lerinden tertîb buyurup, sene-i âtiyede Arpa Emâneti'ni ʿinâyet ve tahsîl tertîbâtına zemân lâzım geldiğinden mahzâ vâreste-i sıklet olması bâbında taʿvîzân vâfir akça ʿan-nakd hazîneden iʿtâ olunup, [M1 181] bervech-i sühûlet umûrunu ru'yet üzere iken ʿazm-i dâr-ı ahret eyledi. Monlacık-zâde İshak Efendi, Edirne Pâyesi'yle mükerrem ve Topkapulu Sâlih Efendi-zâde İstanbul Pâyesi'yle hurrem oldu. Kapucular Kethudâsı olan Silahdâr Paşa birâderi Hüseyin Bey, Mîrahûr-i Sânî nasb ü taʿyîn ve Mîrahûr-i Sânî olan Seyyid Ahmed Ağa, Kapucular Kethudâlığı'yla kâmbîn kılındı. Gencîne-i cevâhir-i esrâr-ı Hudâ ve sipehsâlâr-ı ketîbe-i rusül ü enbiyâ Muhammedü'l-Mustafâ ʿaleyhi mine's-salâti evfâhâ hazretlerinin Ravza-i mutahharaları her ne kadar müstağnî-yi zîb ü zîver ise dahi bir nevʿ tekarrub ve ihtisâs kesbine medâr olmak içün bir cevher-i girân-behâ ihdâsı lâyih-i hâtır-ı Şehinşâhî olmağla, ber vech-i tahmîn dört yüz kîse kıymetlü müseddesü'ş-şekl dört yüz kırata karîb bir kıtʿa zümrüd hazîne-i Şâhânelerinden ifrâz olunup, Medîne-i münevvere Kadısı ve Şeyhu'l-harem maʿrifetleriyle o makām-ı melâyik-huddâma âvîze kılınmak içün takdîm ve Büyük Sakabaşı'ya teslîm olundu. Gül Ahmed Paşa-zâde Vezîr ʿAlî Paşa mukaddem Sadâret'e takrîb olunacağını kable'l-cülûs Sadrıaʿzam tahkīk ve şükât tedârüküyle refʿ-i tûğ ve musâdereden başka İstanköy'e nefy ile eczây-ı sâmânını tefrîk etmişidi. Üç seneden berü cezîre-nişîn ve leyl ü nehâr kârî-yi âh ü enîn olduğu maʿlûm-i Pâdişâh-ı bâhirü't-temkîn olduğuna binâ'en, tûğ u sancağı ibkā ve İç-il mansıbı ile mezraʿa-i nedîde sehâb-ı emeli irvâ olundu. Yeniçeri Ağası Kapu-kıran Mehmed Ağa'nın baʿzı harîklarda gayret ü ikdâmı bizzat maʿlûm-i Pâdişâhî olup, şaʿbânın yedinci cumʿa günü bir kabza hançer-i mücevher ile miyân-bend-i iftihârı pür-zîver kılındı. Yanya Mutasarrıfı Vezîr İsmâʿîl Paşa'nın reʿâyâya olan teʿaddîsi bî-hadd ü pâyân ve reʿâyây-ı mezkûre ʿarz-ı halleriyle birkaç defʿa tahrîk-i silsile-i merhamet-i Pâdişâh-ı zemân eylediklerine binâ'en, fîmâ-baʿd zulm ü sitemden dâmenkeş-i ictinâb ve fukarâ vü zuʿafâyı tetâvül-i dest-i teʿaddî ile mübtelây-ı ıztırâb eylememesi bâbında mükteseb-i serzeniş ü ʿitâb olmuşiken mütenebbih olmayup, kemâ-kân vâdî-yi gafletde bûyân olduğu nümâyân olmağla, Vezâreti refʿ olunup, mübâşiri varmadan firâr ve Arnabûd Belgrad'ı semtlerinde karâr eyleyüp, bir müddetden sonra dâmengîr-i şefâʿat ve cürmü ʿafv olunup o havâlîde muntazar-ı lütf-i Şehriyâr-ı İskender-haslet oldu. Baʿzı husûs müzâkeresiyçün erkân-ı devlet Enderûn-i hümâyûn'da cemʿiyyet eyledikleri gün bedestân etrâfında kâ'in kuyumculardan birkaç hâyin sanduklarını bedestâna [M1 182] sürʿatle nakl etdiklerinden halka bir nevʿ dağdağa îrâs ve etmek kapma ve neşr-i urcûfe etdirmek sûretlerini ihdâs etdiklerinden ikisi kuyumcular içinde sandal bedestânı ittısâlinde berdâr ve o makūle bî-edebler tahvîf ü inzâr olundu. Şehremîni semtinde zümre-i kuzâtdan bir şahs-ı şaʿbedebâzın hânesinde kalbazan âlâtı bulunduğu Bâb-ı ʿâlî'ye ihbâr ve nefy-i ebed ile Mısır'a tesyâr olundu. Şaʿbân-ı şerîfin on beşinci günü kısteyn mevâcibi ihrâc ve tevzîʿ ve baʿde'd-devr Teşrîfât-ı seniyye ile kadr-ı Sadrıaʿzamî terfîʿ olundu.