Eyâlet-i Çıldır'da hükümrân olan Vezîr el-Hâc Ahmed Paşa fi'l-asl Ahısha Ocakzâdelerinden olmak hasebiyle müsâʿade-i tâliʿ-i penç rûzesi muktezâsınca bir müddet- den berü Vezâret'le Çıldır Eyâleti'ne Vâlî ve neseksâz-ı umûr-ı ehâlî olmuşidi. Kellâ inne'l-insâne le-yetğâ en ra'ahü istegnâ nass-ı sarîhi üzere tekādüm-i zemân ile hemyân-ı iktidârı nukūd-i bî-şümâr ile mele'ân ve yemm-i hırs u tamaʿı yevmen fe-yevmen hurûşân olup, semt-i tuğyâna ʿazîmet ve ʿavâkib-i umûru mülâhazadan gaflet edüp, tevsîʿ-i dâyire ve celb-i emvâl-i mütakâsire zımnında Lezgi eşkıyâsıyla muhâbere ve Gürcistan'a [M1 175] itâle-i yed eyliyeceğini müşâvere edüp, bu ʿazîmet-i fâside Lezgi tâyifesinin hevâsına muvâfik ve meramlarına min külli'l-vücûh mutâbık gelüp, müşârun ileyhi igrâ vü tesvîl ve baʿzı mukaddemât-ı mümevvehe ile ifsâd ü tadlîl eylediler. Gürcistân ehâlîsi emed-i baʿîdden berü Devlet-i ʿaliyye'nin reʿâyâsı mesâbesinde olup, himâyet ü sıyânetleri ve bilâ-sebeb rencîde olunmaları hilâf-ı rızây-ı Pâdişâh-ı cemm-haşem iken, müşârun ileyh asker-i kesîf ile üzerlerine hareket ve mukātele ile vâfir nüfûs telef ve izâʿat eyleyüp, bu kâr-ı nâ-hencârdan ferâgat eylemesi her çend tarafına işâret olunduysa dahi baʿzı ʿilel-i gayr-i müvecceh îrâd ve gûn be-gûn âteş-i fitne îkād eylediği maʿlûm-i Şehriyâr-ı vâlâ-nijâd olmağla, Eyâlet-i Çıldır'dan ʿazl ve sâbıkā Diyarbekir Vâlîsi Vezîr İbrâhîm Paşa yerine nakl olunup, maʿzûl-i müşârun ileyhe bir mansıb verilmek tasmîm ve Anadolu'ya çıkması tarafına tefhîm olunmuşidi. Nâçâr emr-i ʿâlîye imtisâl ve Ahısha'dan refʿ-i eskāl edüp, birkaç konak infisâlinde istişʿâr encâm-ı kâr ile terk-i kâr u bâr ve bir gice üç âdem ile matıyye-rân-ı firâr olduğu mübâşiri olan Kapucu-başı Abdâl Mehmed Ağa'ya maʿlûm oldukda, etrâf ü eknâfa âdemler irsâl ve müşârun ileyhi tutup, fi'l-hâl istîsâl ve ser-i maktûʿunu Asitâne'ye îsâl eyledi.