İcmâl-i hâli bâlada nigâşte-i kalem-i nâdire-rakam olan Dilâver Ağa-zâde ʿÖmer Efendi, [mısra]: İnne'l-belâ’e mü’ekkelün bi'l-mantık mefhûmu üzere mesned-i riyâsete tesâʿudunu mukaddime-i mevt ʿadd edüp, kırk günden sonra şîrâze-i ʿömrü münhal ve lebbeyk-zen-i dâʿî-yi ecel olup, Âmedci bulunan ʿAbdullah Efendi, el-Kâtibü kâtimün maʿrifetiyle meşhûr ve cevdet-i hat ile zebânzed-i cumhûr olduğuna binâ'en, zilkaʿdenin yirmi üçüncü günü Re'îsülküttâb ve mahsûd-i ricâl-i bâb oldu. Müteveffây-ı mûmâ ileyh rumûz-âşinây-ı kitâbet ve yeke-süvâr-ı meydân-ı maʿrifet sebk-i kelâma kādir olduğu Hadîka'ya yazdığı zeylden zâhirdir. Belgrad Binâ Emîni Zaʿîm Mustafa Ağa'nın zevâhir-i ahvâlinden liyâkat fehm olunup, tevcîhâtda Çavuş-başı nasb olunmuşidi. Umûr-i Dîvâniyye'yi idârede râcil ve her mâddenin hüsn ü kubhunu temyîzde câhil olmağla, zilhiccenin ikinci günü ʿazl ü tezlîl ve Çavuş-başılık ile Sadrıaʿzam Kapucular Kethudâsı Hatîb-zâde Ahmed Efendi tebcîl olundu.