Sadrıaʿzam Kethudâsı olan Hamza Hâmid Efendi, rehâvet ve teʾennî ile şöhretgîr ve baʿzı mühimmât-ı devlet karîn-i ʿukde-i teʾhîr olduğu maʿlûm-i Sadr-ı müşterî-tedbîr olup, [mısra]: Ve küllü musʿadetin yevmen se-tenhadir mefhûmunca şehr-i mezkûrun yirmi altıncı günü ʿazl ve hânesinde ikāmet ve duʿây-ı devâm-ı Pâdişâhî'ye muvâzabet eyledi. Yeniçeri Kâtibi olan Subhî-zâde ʿAbdullah Efendi'nin gonçe-i ümmîdi nesîm-i subh-i emânî ile şüküfte vü handân ve fecr-i sâdık-ı bahtı meşrik-ı ikbâlden dırahşân olup, yevm-i mezkûrda Kethudâlık mesned-i refîʿi ile tebcîl ve kafesî destârları dülbend-i emîrâneye tebdîl ve münhal olan Yeniçeri Kitâbeti'ne, Subhî el-Hâc Mehmed Efendi tavsîl olundu. Oldu Subhî-zâde ʿAbdullah Efendi Kethudâ (اولدى صبحي زاده عبدالله افندی کتخدا) târîhi Defterdar Halîmî Efendi'nin zâde-i tabʿıdır.