Sâbıkā Silahdâr-ı Şehriyârî İbrâhîm Bey, bâlâda zikr olunduğu vech üzere maskat-ı re'si olan Ahısha'ya nefy olunmuşidi. Mûmâ ileyh hakkında mütemeyyizân-ı Enderûn, tahrîk-i [M1 152] silsile-i ʿafv ü ihsân ve merrât-ı niyâzlarında sûret-i müsâʿade nümâyân olunup, İznikmid'de ikāmeti içün ısdâr-ı fermân kılındı. Silahdâr-ı Şehriyârî iken ber-vech-i tekāʿüd visâde-i râhata tevessüd eden Boşnak Hüseyin Ağa'nın sâyir ricâl-i devlet gibi hıdemâtda istihdâm olunarak âzmâyiş-i umûr eylemesi, havâlî-gerd-i zamîr-i Şehinşâhî olduğuna binâ'en, Cumâdelâhıre evâyilinde Kapucular Kethudâlığı'yla dilşâd ve beş on günden sonra baʿzı etvâr-ı şütür-gürbesi vâsıl-ı semʿ-i Şehriyâr-ı vâlâ-nijâd olup, fi'l-hâl ʿazl ve Edirne'ye ibʿâd olundu. Kayseriyyeli Yazıcı İbrâhîm Efendi, sâhib-i servet ü yesâr ve Surre Emâneti'ne min külli'l-vücûh sezâvâr olmağla, Cumâdelâhıre'de mûmâ ileyh Surre Emîni nasb u taʿyîn ve mes'ûlât-ı ʿâdiyesi teshîl ü tehvîn olundu. Nisvân tâyifesinin ziyy ü reftârda olan harekât-ı nâ-hemvârları vakt be-vakt inzi-cârlarını müstevcib olup, bu defʿa dahi sâbıklarda olduğu gibi tenbîhât-ı ʿekîde ile mezbûrelere taʿyîn-i hudûd ve menʿ-i irâ'e-i vücûh u hudûd kılınup, mesîrelerden men ve mevziʿ-i töhmet olan mahallerden pây-i tecâvüzleri katʿ olundu. Sâbıkā Dârü's-saʿâde Ağası Yazıcısı Mehter-zâde ʿAli Efendi'nin Kum-kapu kurbünde muhterik olan hânesini ʿamele hafr eder iken, tahte'l-arz bir mikdâr altûn zuhûr eylediği Bâb-ı ʿâlî'ye ihbâr ve Defterdâr Efendi'ye buyuruldu ısdâr olunup, Başbakīkulu Ağa'yı irsâl ve nakd-i mezkûru getürüp, hazîneye idhâl eyledi. Hanya Sancağı, Vezîr Kâmil Ahmed Paşa'ya ve İç-il Sancağı, sâbıkā Maraş Vâlîsi Vezîr Dîbâcı İbrâhîm Paşa'ya ve Marʿaş Eyâleti, sâbıkā İnebahtı Mutasarrıfı Mîr-i mîrân'dan Mısrî Ahmed Paşa'ya evâsıt-ı Cumâdelâhıre'de tevcîh olunup, Nakībü'l-eşrâf Şerîf Mehmed Monla Efendi dahi târîh-i mezkûrda ʿazl-i nâgeh-zuhûr ile mükedder ve Nekābet mansıb-ı celîli İdrîs-zâde Mehmed Efendi'ye müyesser oldu.