Müşârun ileyhe mukaddemâ Anadolu Eyâleti tevcîh olunup, bir müddet İzmir'de ikāmet ve her gün darb-ı nevbet-i mehâbet ile icrây-ı hükûmet ve Sadrıaʿzam'ın müşârun ileyhe kıdem-i hidmeti olmak cihetiyle haline terk edüp, İzmir'de ikāmet muhâlif-i rızây-ı devletdir demekden hicâb ü edeb etmişidi. Hele ne hâl ise [M1 133] kürsiyy-i eyâleti olan Kütahya'ya gelüp, birkaç gün mübtelây-ı renc ü elem ve yetmiş bir senesi zilhiccesinin dokuzuncu günü diyâr-ı ʿademe vazʿ-ı kadem edüp, hisârın câmiʿi civârında vedîʿa-i sandûka-i serâ ve reh-peymây-ı semt-i bekā oldu. Müşârun ileyh emârât-ı mevti ihsâs ile fevtinden birkaç sâʿat mukaddem kendü kalemleriyle bir kıtʿa vasiyyet-nâme tertîb edüp, Âsitâne-i saʿâdet'de Altı-mermer semtinde müceddeden binâ etdiği câmiʿ-i şerîf ittısâlinde âmâde eylediği türbesine defn olunması cümle-i vesâyâsından olduğunu evlâd ü ʿıyâl bâ-ʿarzuhâl ifâde etmişler idi. Bu makūle nâmdâr vezîrler ve mûtû kable en temûtû me'âlini fehm ile mukaddemce evkāf u hayrât tertib eden zâtların taşrada vefâtları vukūʿunda Âsitâne'ye nakl ve iʿdâd eyledikleri merâkıdde defn olundukları mesbûk olduğuna binâ'en, müşârun ileyh hakkında dahi müsâʿade erzânî kılınup, Kütahya'da tahte'l-arz yirmi altı gün meksden sonra ihrâc ve taht-1 revâna vazʿ ve Âsitâne'de vâkiʿ mezârına idrâc olundu. Cesedine ʿârıza-i fenâ tetarruk etmeyüp, fekat mehâsininin bir tarafı pûsîde olduğunu sikadan baʿzıları rivâyet etmişdir.