Müşârun ileyh fi'l-asl ocağı ricâlinden olup, tekmîl-i tarîk eyleyerek Yeniçeri Ağalığı mesnedine irtikā ve gāyet-i tarîkına vüsûl ile kesb-i dest-mâye-i iʿtilâ etmişidi. Cülûs-ı hümâyûn'da tavr u hareketi mizâc-ı feyz-imtizâc-ı Mülûkâne'ye hoş gelüp, tezâyüd-ı şevk u himmeti irâdesiyle Vezâret'le be-kâm ve matlûbu üzere nâyil-i merâm olmuşidi. Ancak müşârun ileyh hilm-i müfrit ile meʾlûf ve umûrunda rehâvetle maʿrûf olup, icrây-ı ahkâm-ı siyâsetde mecbûr-ı kusûr u tevânî ve ihtişâm ü zîynet-ı [M1 115] libâsda tâvûs-ı beyâbânî olduğu maʿlûm-i Cihânbânî olmağla ʿazli murâd ve selh-ı şaʿbânda esâmesi Hanya Muhâfazası'na küşâd olunup, Kul Kethudâsı Vefâlı Mehmed Ağa, Yeniçeri Ağalığı hilʿatiyle kâm-bîn ve tarîkleri üzere silsileleri vâkiʿ olup, her biri câh-ı mahsûs ile mahfûf-i ʿavârif-ı Dâver-i rûy-ı zemîn oldu. Ramazân-ı şerîf rikâbında, Defterdar-ı vakt bulunan el-Hâc Ahmed Efendi'nin tahsîl-ı mâl-ı mîrîde kusûru mezkûr ve ʿazli merâm-ı Sadru's-sudûr olup, rikâb ʿavdetinde Halîmî Mustafa Efendi daʿvet ve bu defʿa dahi Defterdârlık mansıbıyla manzûr-i nigâh-ı re'fet kılındı.