Sâbıkā Kapucular Kethudâsı ʿArabgîrli İbrâhîm Bey, Rodos Cezîresi'ne ve Monlacık-zâde ʿAli Ağa, Filibe'ye birer töhmet-i nâ-müvecceh ile nefy olunmuşlar idi. Haklarında eltâf-ı Pâdişâhâne taʿmîm ve ʿafv ü ıtlâkları emri, âdemlerine teslîm olundu. Yevm-i mezkûrda Bostâncı-başı Hüseyin Ağa dahi ʿazl ve yerine Hasekî Ahmed Ağa vasl olundu. Birkaç gün mukaddem Mevkūfât ve Haremeyn mukātaʿası mansıblarıyle be-kâm olan İbrâhîm Efendi ve Mustafa Efendi'nin müşâhede eyledikleri hâb-nûşîn-i câh-ı ezgāsü ahlâm menzilini cây-gâh edüp, Mevkūfât, Muhsin-zâde Ahmed Bey'e ve mukātaʿa-i Haremeyn sâbıkā Baş-muhasebe Kîsedârı İbrâhîm Efendi'ye ihsân ve dâmâd-ı Sadrıaʿzamî Hüseyin Ağa'nın Büyük Mîrahûrluk ile necm-i ikbâli fürûzân kılınup, Bergosî Mehmed Ağa'ya, münhal olan Silahdâr Ağalığı ve Kırımî Hüseyin Ağa'ya, Küçük Mîrahûrluk tevcîh ü ʿinâyet ve henüz nefyden reh-yâb olan Monlacık-zâde ʿAli Ağa, Baş-bâkī Kulluğu'yla mazhar-ı rahm ü şefekat kılındı. Sâbıkā Çavuşbaşı olan Ahıshalı Mehmed Ağa, makāmına iʿâde ve selefi Çelik Paşa, Kethudâsı ʿAli Ağa'nın hânesinde ikāmeti irâde olunup, Vezîr firârî Mustafa Paşa, dağdağa-i tek ü tâz arz-ı fesîhden izhâr-ı melâl ve Nevşehir'de ber-vech-i tekāʿüd ikāmeti içün dest-güşây-ı ibtihâl olmağla, pîrliğine merhamet ve mahall-i mezkûrda ikāmetine ısdâr-ı emr-i izn ü ruhsat kılındı.