Bir müddetden berü Dârü's-saʿâde Ağası olan Ebû Kof Ahmed Ağa sâde-dil ve sâf-zamîr olduğu şöhret-gîr ise dahi sadâkat ü istikāmeti nümâyân ve kelâm-ı hakkı sürʿat-i kabûlde fâyiku'l-akrân olup, ancak hutâm-ı dünyaya heveskâr ve etrâfında bulunan havene-i rûzgârın mekr ü firîbinden ictinâb edemeyüp, zâtı mevzûʿ-i bahs-i agyâr olduğundan gayri, Esʿad Paşa'nın ʿazli ve meçhûlü'l-isim bir şahsa Şâm'ın tevcîhiyle nehb-i hüccâc ʿilleti müşârun ileyhe isnâd olunmuş idi. Bu esbâb ile ʿazli karârgîr ve şehr-i saferin yirmi dördüncü günü ʿazl ve Mısr-ı Kāhire tarafına şukka-güşây-ı mesîr oldu. Baş-musâhib Beşîr Ağa'da bu makām-ı refîʿa istiʿdâd-ı mahsûs u melhûz ve zâtında sû'-i zikr ile gayr-i melfûz olup, yevm-i mezkûrda Dârü's-saʿâde Ağalığı'yla kadri mevfûr ve huzûr-i hümâyûnda lâbis-i ferve-i semmûr oldu.