Sadr-ı meʿârif-pîrâ ve düstûr-i Asaf-râ olan Ragıb Mehmed Paşa cenâblarının daʿveti zımnında irsâl olunan Silahdâr-ı hazret-i Şehriyârî müşârun ileyh ile iltikā ve bir ân akdem südde-i saʿâdet'e vusûllerini inhâ etmişler idi. Sebükbârca hareket ve Cumâdelâhıre'nin yirmi sekizinci günü Âsitâne-yi saʿâdet'e ilkāy-ı rahl-i saʿâdet eyleyecekleri, resîde-i derece-i sıhhat ve fi'l-hâl Üsküdar'da vâkiʿ Mehmed Paşa kasrında resm-i kadîm üzere yemeklik tertîb olunup, huzûrları muʿtâd olan erkân-ı devlet daʿvet ve müteheyyi-i kudûm-i Sadr-ı Felâtûn-menkabet olmuşlar idi. Yevm-i mezkûrda kasr-ı mezkûre pâ-nihâde ve baʿde't-taʿâm Şeyhulislâm Efendi ile bi'l-mürâfaka huzûr-ı hümâyûna ruhsûde olup, hilʿat-i zerrîn-tırâz-ı Sadâret ile kāmet-i istihkākı teşrîf ve sâmia-i Asafânesi dürr-i yektây-ı tenbîh-i Şâhâne ile teşnîf olundu. Huzûr-ı hümâyûn'dan ruhsatyâb-ı ʿavd- ü insırâf ve müretteb alay ile Bâb-ı ʿâlî'ye gelüp, icrây-ı merâsim-i eslâf ve mütesaddî-yi ruʾyet-i umûr-i etrâf oldu. Üç gün sonra ber-vech-i muʿtâd hatt-ı hümâyûn şeref-vürûd olup, me'âli selefinin rehâvetinden ve fîmâ baʿd hutûb-i devletde tekâsül olunmamakdan ʿibâret olup, sûret-i imtisâlde telhîs tahrîr ve hâk-i kadem-i Şehriyârî'ye tesyîr olunup, ʿakabinde müzeyyen bir rahş-ı dil-keş dahi taraf-ı hümâyûndan şeref-bahş-ı vürûd ve resm-i ʿâdî icrâsından sonra resânende-i esb olanlara kürk ve hilʿat iksâ olunduğundan başka kîse-i ümmîdleri mâ-lâ-mâl nükūd oldu.