Biz zâhir-i hâlden bahs ile sadede gelelim. Rebîʿulâhırın yirminci sülesâ günü dîvân olup, Sadrıaʿzam henüz ʿavdet etmişiken: Ecibi'l-emîr! nidâsıyla, Enderûn-i hümâyûn'a getürdilüp, resmen Dârüssaʿâde odasında vakfe-gîr-i istirâhat olur olmaz mühr-i hümâyûn yedinden nezʿ olunup, Balık-hâne'ye gönderilmişidi. Ferdâsı bilâ-musâdere Rodos Cezîresi'ne ʿazîmeti istiʿcâl ve bâlâda zikr u tafsîl olunduğu vech üzere nüvîd-i Sadâret, Haleb Vâlîsi Vezîr Râgıb Mehmed Paşa'ya irsâl olundu. Müşârun ileyhin bu defʿa Sadâreti dokuz mâh mikdârıdır. Sadrıaʿzam Âsitâne'ye gelinceye dek ru'yet-i umûr-i ʿibâd ve tanzîm-i şevârid-i bilâd zımnında Kapucular Kethudâsı bulunan el-Hâc ʿAli Ağa, rütbe-i vâlâ-yı Vezâret'le Kāyim-makām nasb ü taʿyîn ve İskemlecibaşı Mustafa Ağa, müşârun ileyhe câ-nişîn kılındı. Kāyim-makām-ı ʿâlî-makām mahallinde müstekar oldukdan sonra, muʿtâd üzere Re'îsü'l-küttâb efendi Vezâret berâtı ve Tevkīʿî Efendi, nişân-ı hümâyûn takımı ve Mîr-ʿalem tûğ getürüp, müşârun ileyh tarafından dahi kürkler ve müzeyyen esbler ve defter-i teşrîfât mantûku üzere ʿatıyyeler verilüp, tekmîl-i [M1 89] şân-ı devlet ve îfây-ı resm-i saltanat kılındı. El-hâletü hâzihî bu tarîk-i mergūb gayr-i meslûk ve bu resm-i kadîm mülgā vü metrûk olup, erbâb-ı ʿavâyid çeşm-i hasretle dûrdan nazar ve intifây-ı fevâyid-i mansıb ile tecerruʿ-i hûn-i ciğer ederler.