Midillü Cezîresi'nin cânib-i garbîsinde vâkiʿ Sagrı Limanı İskenderiyye ve sâyir mahallerden vürûd eden sefâyine me'vâ ve furtunaya uğrayanlara leyl ü nehâr melce' ü me'vâ olup, ancak baʿzan Maltalu'nun korsan gemileri limân-ı mezkûrda ihtifâ ve gözlerine kesdirdikleri sefâyini zabt ve halkına cevr ü cefâ ederler idi. Ak-deniz'de ticâretle me'lûf olan ru'esâ ve mellâhânın cihet-i emniyyetleri maʿkûd ve güzergâhları mesdûd olup, bu beliyyenin çâresi görülmek ve lîmân-ı mezkûrun sûret-i muhâfazasına himmet ü ikdâm olunmak tazarruʿâtını Dîvân-ı ʿâlî'de tekrîr ve evliyây-ı devlet dahi hüsn ü kubh-i mâddeyi te'emmül ile niyâzlarına müsâʿadeyi izmâr-ı zamîr edüp, baʿzı meşâgil-i devlet sebebi ile bu âna dek te'hîr olunmuşidi. Bu esnâda keyfiyyet Südde-i saʿâdet'e ʿarz ü takdîm ve lîmân-ı mezkûrun istihkâm ve muhâfazası elzem-i umûrdan olduğu ifâde vü tefhîm olunup, tabʿ-ı Şâhâne'de bu makūle hayr ü hasenâta meyl ü rükûn gûn-be-gûn efzûn olup, hatta Ahur-kapu hâricinde ihtirâʿ ü îcâd ve şeb-i târda medâr-ı fark-ı beyâz ü sevâd olan fenârın vazʿında hâsıl olan muhassenât bi't-tecribe maʿlûm-i hümâyûnları olduğundan, bu eser-i nev-bünyâdın dahi zemân-ı saʿd-iktirânlarında husûlünü taleb ve irtiyâd buyurmalarıyle, fi'l-hâl emr-i hümâyûnları sâdır ve lîmân-ı mezkûrda bir kalʿa-i metînü'l-esâs ve bir maʿkıl-i müstahîlü'l-indirâs binâ olunmak irâdesi zâhir olup, Kapudan Paşa bi'n-nefs mahalline ʿazîmet ve keşf ü muʿâyeneden sonra şaʿbânın altıncı günü vazʿ-ı esâsa mübâşeret edüp, altı ay müddetde tekmîl ve âsâyiş-i nâs tahsîl olundu. Kalʿa-i mezkûrenin tabye ve burcuna ejder-peyker toplar ve hevânlar taʿbiya vü tanzîm ve dizdâr ve neferât ve mühimmât ile cihet-i istihkâmı tetmîm olunup, şöyle ki vasat-ı sâhilde tarafeyn boğazlarına nâzır muhammesü'ş-şekl tahmînen on iki bin zirâʿi hâvî bir kalʿa-i rasîne olduğu İspanya sefâretiyle ricʿatde manzûr-i Fakīr olmuşdur. Mustahfızları gāyet mutabassır olup, hatta İspanya Beyliği ile gelür iken hevâda muhâlefet ve emvâc-ı deryâda şiddet olmak takrîbi ile bi'z-zarûre lîmân pîşgâhına vazʿ-ı tîmûr edeceğimizi kalʿa neferâtı müşâhede ve sefâyin-i ecânib zannıyle der-ʿakab pîrâmen-i kalʿada izhâr-ı etvâr-ı muhârebe vü mutârade eylediler. Tarafımızdan âdem irsâliyle beyân-ı mâdde [M1 83] olundukda, fi'l-cümle kesb-i emniyyet edüp, hâricden baʿzı levâzım tedârüküne müsâʿade eylediler. Kalʿa-i mezkûreeye bir sâʿat yerden mâ'-i lezîz getürdilüp, iki câmiʿ ve bir hammâm ve birkaç mahalde akarsuları olup, mahallinde bünyâd ü te'sîs olunmuş ve korsan ve sâyir lusûs-ı bahriyyeyi o sâhilden menʿ etmiş bir kalʿa olduğu muhtâc-ı beyân değildir.