Şehr-i mezkûrun on yedinci günü Mîrahûr-i Evvel ʿAli Bey tarafından Şehriyâr-ı sütûde-sîret hazretlerine tertîb-i ziyâfet olunup, tenezzülen teşrîf ve baʿde't-taʿâm sâha-i Şâhâne'ye müzeyyen esb çekilüp, bu mukābelede semmûr kürk ile mîr-i mûmâ ileyh taltîf olundu. Hevâlarda cevdet ve rûy-i deryâya letâfet ʿârız olduğundan, Sâhil-serây-ı Beşiktaş'a rağbet derkâr olup, binâ’en ʿalâ zâlik şehr-i mezkûrun yirminci pençşenbih günü, Eyledi bir burcdan bir burca tahvîl-i âfitâb mefhûmu üzere Sâhil-serây-ı mezkûreyi âfitâb-ı cihântâb-ı talʿatleri münevver ve o mahall-i dil-güşâyı kudûm-i Şâhâne'leri sahn-ı behişte hemser eyledi.