Nüvîd-i Sâdâret'le berîd-i beşâret, Mora Muhassılı Mustafa Paşa'ya müsâraʿat edüp, vâkıf-ı keyfiyyet oldukları ân, sebükbârca Âsitâne tarafına irhây-ı ʿinân etmişler idi. Kurb-i devlete resîde oldukları şenîde olduğundan, Behâriyede yemeklik tertîb olunup, baʿde't-taʿâm sandala süvâr ve Yalı-köşkü'nden Serây-ı ʿâmire'ye güzâr ve şaʿbânü'l-muazzamın üçüncü günü huzûr-ı Şehriyârî'de iktisây-ı hilʿat-i Sadâret ve tesellüm-i mühr-i Vekâlet ile kesb-i dest-mâye-i ibtihâc ü istibşâr eyledi. Şehinşâh-ı mekârim-muʿtâd Yalı-köşkü dervâzelerin küşâd etdirdüp, alayına nigâh-endâz-ı şevket oldukların Sadr-ı müşârun ileyh teferrüs edüp, cây-gâh-ı Pâdişâh olan mahalle geldikde, bâlây-ı rahşda üç defʿa kadd-hamîde-i taʿzîm ve âdâb-ı ʿubûdiyyeti tetmîm eyleyüp, Serây-ı Âsafâne'lerine pâ-nihâde-i vüsûl ve Şeyhulislâm ve Kāyim-makām Paşa resmi itmâmında dîvân yerine nüzûl ve ʿumûm haftânları ilbâsiyle erbâb-ı menâsıbın cümlesi nazar-ı ʿâtıfete meşmûl oldu. Üç günden sonra tenbîhât-ı Hüsrevâne'yi şâmil hatt-ı hümâyûn ve dahi sonra esb-i müzeyyen ile şân-ı Sadâret-penâhî efzûn kılındı.