İşbu receb-i şerîfin yirmi yedinci Miʿrâc gicesi sadef-i dürdâne-i saltanat ve maʿden-i cevher-i nâ-yâb-ı devlet Âsiye-ʿismet, Belkıs-nezâhet, Meryem-ʿiffet, Âsiye-üsvet Vâlide Sultân hazretleri baʿzı emrâz-ı bedeniyye ile müte’essir ve safv-ı ʿîş ü zindegânîsi mütekedder olup, mürg-i rûh-i latîfi kafes-i tenden tâyir ve ʿazm-i serâbistân-ı fî makʿad-i sıdkın ʿinde melîkin muktedir oldu. Fi'l-hâl emr-i techîz ü tekfîne iştigāl ü ikmâl ve Şehriyâr-ı Hamîdü'l-hısâl Bâbü's-saʿâde'ye dek icrây-ı resm-i teşyîʿ ve îfây-ı hakk-ı tevdîʿ eyleyüp, Şeyhülislâm ve Kāyim-makām Paşa ve sâyir ricâl-i devlet ve meşâyih-i kirâm na'ş-ı mağfiret-nakşı cevânibinde rahmet-hân olarak Nûr-i ʿOsmânî Câmiʿi hazîresinde o dürr-i ʿakīleyi mütevârî-yi zîr-i turâb ve o cevher-girân-mâyeyi vedîʿa-i mağfiret-i Rabbü'l-erbâb eylediler. Müşârun ileyhâ hazretleri Râbiʿatü'l-ʿadeviyye gibi leyl ü nehâr ʿibâdet ü tâʿat-ı Bârî ile evkāt-güzâr ve ekser-i evkāt abdestsiz yere basmadığı tevâtür-yâb-ı iştihâr olduğundan gayrı, hidmet-güzârân-ı sürâdikāt-ı ʿismetleri olan muhadderâta her gice bin beş yüz Sûre-i İhlâs okutmadan gunûde-i visâde-i hâb olmadığı mervîdir.