Rütbe-i Mîr-i mîrânî ile deryâya Kapudan ve merâkib-i Tersâne-i 'âmire'ye hükümrân olan Karabâğî Süleymân Paşa'nın nâsıye-i hâlinde âsâr-ı istiʿdâd nümâyân ve tavr ü hareketinden Devlet-i ʿaliyye'ye hidmet ve sadâkat emâresi zâhir ü ʿıyân olmağla, işbu şehr-i receb evâyilinde Bâb-ı âlî'ye daʿvet ve menkib-i istihkākına ilbâs-ı hilʿat-i Vezâret kılınup, kemâ-kân deryaya Kapudan ve mutasarrıf-ı bahr-ı bî-pâyân kılındı. Şehr-i mezkûrun onuncu günü müşârun ileyh Donanma-yı hümâyûnu istishâb ve şiddet-i rîh her ne kadar iztırâb verdi ise dahi Baştarde ve çekdirmeler ile Dolmabağçe pîşgâhına vazʿ-ı lenger-i ikāmet ve birkaç günden sonra Ak-deniz'e doğru ve feth-i şukka-i ʿazîmet eyledi.