Beş mâh kadar Sadr-ı devlet'de mukīm ve tabʿ-ı müstakīm ile nesak-sâz-ı emr-i hâdis ü kādim olan Mehmed Saʿîd Paşa'dan mizâc-ı zemânede olan televvün ve tesârîf-i rûzgârda olan ʿadem-i temekkün taʿayyünü ile gurre-i recebde yedinden mühr-i hümâyûn nezʿ ü istirdâd ve oğlu Mesʿûd Bey mübâşiriyyeti ile İstanköy Cezîresi'ne ibʿâd olunup, hakkında kemâl-i kerem-i Şahâne rû-nümûn ve musâdere ve muʾâhazeden masûn oldu. Dergāh-ı ʿâlî Yeniçeri Ağası olan İbrâhîm Ağa, Kayim-makām-ı Sadr-ı ʿâlî ve merciʿ-i esâfil ü eʿâlî olup, Sadâret-i ʿuzmâ ve Vekâlet-i kübrâ Mora Muhassılı Sadr-ı esbak Mustafa Paşa'ya teveccüh ü ikbâl ve bu defʿa dahi dağzen-i kulûb-i akrân ü emsâl oldu.