Kapudan-ı sâbık Vezîr Turak Mehmed Paşa, Resmo'da menfiyyen mukîm iken, ecel-i mevʿûd rûhunu bedeninden ıtlâk ve zümre-i mevtâya ilhâk eyledi. Şehriyâr-ı deryâ-nisâr zuʿafâ-yı hâcegān hakkında rahm ü şefekat izhâr ve hâllerine göre taksîm olunmak içün elli kîse meblağ ihsânıyla o makūle zuʿafâyı kemâl-i kereminden hisse-dâr eyledi. Nakîbü'l-eşrâf olan Rızâ Efendi, riyâset-i ehl-i siyâdetden maʿzûl ve Mehmed Monla Efendi, o câh-ı refîʿa mevsûl oldu. Masraf Kâtibi olan Gürcü Süleymân Efendi, mansıb-ı mezkûre nâ-çesbân ve tavr u hareketi muhâlif-i rızây-ı ʿuzamây-ı zemân olduğuna binâ'en, evâsıt-ı rebîʿulevvelde ʿazl ile te'dîb ve Gelibolu'ya tagrîb olunup, münhal olan Masraf-ı Şehriyârî Kitâbeti ile sâbıkı Cânibî Dâmâdı Ahmed Efendi tatyîb olundu.