Anadolu'da Eyâyeti'nde olan eşkıyâyı iʿdâm ile Aydın Sancağı'na nizâm vermek ve o havâlîyi tesallut-i cebâbireden tahlîsa ihtimâm eylemek şartıyla Aydın Sancağı, Anadolu Vâlîsi Vezîr ʿAli Paşa'ya ilhâk ü zamm ve Sivas Eyâleti'yle, Çeteci ʿAbdullah Paşa mükerrem kılınup, Erzurum Eyâleti, sâbıkā Kāyim-makām Vezîr Sarı Mustafa Paşa'ya ihsân ve Tırhala Sancağı ile sâbıkā Özi Muhâfızı Vezîr İbrâhîm Paşa ferhân kılınup, münhal olan Özi Eyâleti'yle, Tırhala Mutasarrıfı Vezîr Halîl Paşa mübeccel kılındı. [M1 71] Bu esnâda Kuds-i şerîf'in eşkıyây-ı ʿUrban'dan muhâfazası elzem ve muktedir ve sâhib-i nüfûz bir kimsenin o tarafda vücûdu ehemm olup, Gazze Mütesellimi Hüseyin Ağa'da, istiʿdâd-ı muhâfaza mülâhaza olunduğundan, saferin sekizinci günü dâyire-i Mîr-i mîrânî'ye idhâl ve Kudüs muhâfazasına irsâl olundu.