Matlaʿ-ı Sadâret'de taraf-ı hümâyûndan müzeyyen esb irsâli muʿtâd olduğuna binâ'en, muharremde Mîrahûr-i Evvel Beyefendi ile bir re's esb-i müzeyyen vürûd eyleyeceği Sadrıaʿzam'a ihbâr olunup, seng-i rikâbda [M1 70] istâde-i rasad-gâh-ı intizâr olmuş idi. Zikr olunan esb-i kûh-nümûd şeref-vürûd ve fi'l-hâl ʿinân-ı meymenet-nişânı mâlîde-i cebhe-i kemâl-i neşât u sürûd kılınup, Sadrıaʿzam yerinden vüsûb ve sahve-i esbe rükûb ve birkaç hatve tesrîhden sonra nüzûl ve mîr-i mûmâ ileyhi kürk ve nakd ve maʿiyyetinde olanları hilaʿ u ʿatâyâ ile nâyil-i me'mûl eyledi.