Bu esnâda birkaç kıta topun eczâsı müheyyâ ve kavâlibine ifrâg olunmak tasmîmi Bâb-ı ʿâlî'ye inhâ olunup, sanʿat-ı mezkûrenin temâşâsı hâtır-ı Şâhâne'de cilveger olduğu maʿlûm-i Sadr-ı muvakkar olmağla, mukaddemce Tophâne'ye râhî ve muntazır-ı kudûm-i Pâdişâhî olmuşidi. Şehriyâr-ı Cem-tavsîf Tophâne'yi teşrîf ve Sadrıaʿzam ve sâʾir saf-beste-i taʿzîm olan bendegânı tahrîk-i ebrûy-i iltifât ile taltîf buyurup, celse-i hafîfeden sonra izâbe olunan eczây-ı maʿdeniyye nehr-i sâyil gibi kavâlibe cârî ve bu mukābelede Topçu-başı ve Nâzır ve sâʾir zâbitân mültefet-i hazret-i Tâcdârî olup, kimi hilʿat-i zâhire ve kimi ʿatâyây-ı vâfire ile kesb-i iftihâr ve Padişâh-ı gerdûn-iktidâr dahi bir iki sâʿat Tersâne bağçesinde karâr ve Serây-ı ʿâlî'lerine nihâde-i pây-i şeref ü iʿtibâr eyledi.