Müşârun ileyhin irtișâ ve kizb-i nâ-sezâya dâ'ir baʿzı etvâr-ı nigûhîdesi sâmiʿa-i hümâyûna ilkā ve ʿacele vü ʿadem-i teʾennî tashîh-i müftereyâta vakit bırakmayup, sâl-i mezkûr muharreminin on dokuzuncu sebt günü mühr-i hümâyûn yedinden nezʿ ve kapu arasında izâʿa vü ifnâ olundu. İki sâʿat murûrunda mir'ât-ı tabʿ-ı Tâcdârî jeng-beste-i nedâmet ve bu hâdiseye sebeb olanlar seng-sâr-ı inkisâr u melâmet oldu. Nazm: Lâ taʿcelenne li-emrin künte tefʿalühü Fe-rubbemâ yuʿassiru'l-insânü min ʿacel Yevm-i mezkûrda Kethudây-ı Sadr-ı ʿâlî bulunan Mehmed Saʿîd Efendi huzûr-i Şâhâne'ye getirülüp, mühr-i hümâyûn yed-i kifâyetine tevdîʿ ve ferve-i Sâdâret'le kadri terfîʿ ve Bâb-ı ʿâlî'ye rücûʿlarında erbâb-ı menâsıba [M1 68] ʿumûm hilʿatleri iksâ ve mansıblarını ibkā eyledi. Sadâret-i ʿuzmâ sebebi ile münhal olan Kethudâlık câh-ı refîʿi, Re'îsülküttâb olan Kâmil Ahmed Efendi'ye ve Riyâset-i Küttâb, müddet-i medîdeden berü Mektûbçuluk hidmetinde olan Hamza Hâmid Efendi'ye tevcîh olundu.