Zilhiccenin yirmi ikinci bâzâr gicesi sâʿat altıda iken Hoca Paşa kurbunda Timur-kapu hizâsında bir hâneden âteş-i cevvâle-i zebâne-keş zuhûr ve şiddet-i rûzgâr ile bir-kaç kol olarak sâlib-i ʿakl ü şuʿûr olup, bir tarafdan Bağçe-kapusu'na dek yemîn ü yesârını ve Muhsin-zâde serâyını ve kalʿa dîvârından aşup, yeşil kiremidli câmiʿi ve bir tarafdan Paşa-kapusu ve Derzîler Kâr-hânesi ve Defterdâr Kapusu ve Dîvân-yolu'ndan Mehterhâne ve Defter-hâne'yi ve bir tarafdan Mahmûd Paşa Çarşusu'ndan Çukacılar Hânı'nı ve bir tarafdan Ayasofya Çarşusu'nu Sovuk-çeşme havâlîsine dek suzân ve otuz altı sâʿat imtidâd ile itfâsına meʾmûr olanları bî-tâb ü tüvân edüp, insıbâb-ı sehâb-ı lütf-i Rabbü'l-erbâb ile ne hâl ise o beliyye-i ʿuzmâ zâ’il ve havf-i sirâyetle muztaribü'l-kulûb olanlara tuma'nînet ü sükûn hâsıl oldu. İhrâkdan tahlîs olunan eşyâ zîk-ı mekân hasebiyle muhâfaza olunamayup, yerden yere nakl ile zuʿâfây-ı nâs bî-mecâl olduğunu Pâdişâh-ı zemân bi'n-nefs müşâhede ve Sovuk-çeşme kapusunu küşâde etdirüp, Ağa-bağçesi sâhasına nakl-i eşyâya ruhsât-dâde olmalarıyla, bây ü gedâ bu lütf-i bî-intihâ sebebi ile bekā-yı Devlet-i Şehinşâhî içün secde-ber-endâz-ı mihrâb-ı duʿâ oldular. Paşa-kapusu binâ olununcaya dek ru'yet-i umûr-i ʿibâd içün bir mahall-i ihtisâsî lâzım gelüp, Esmâ Sultân-ı ʿaliyyetü'ş-şân hazretleri sâhil-hânelerinde olduklarına binâʾen, Kadırga Limanı'nda olan serâyları Paşa-kapusu olmak üzere istîzân ü ruhsat ihtilâsında serây-ı mezkûr Sadrıaʿzam'a mekân ve mahall-i dîvân kılındı.